No contrata servicionan di hende of  companianan cu no ta registra na Camara di Comercio

Sea consciente:

           ORANJESTAD (AAN):  Ta cos di tur dia scucha of haya sa di reclamonan di personanan cu a indica cu nan a contrata un hende of un 'compania' pa drecha algo na nan cas. E casonan mas comun ta pa drecha entre otro algun mashin, drecha dak, trabaonan di coriente, airco, etc.

            Bida diario ta involucra hopi proyecto y trabou cu mester ta den man di expertonan. Fo'i drecha algo na cas of oficina, pa construccion, limpiesa, y ofrece diferente servicio.

            Den e proceso aki, ta masha importante pa ta consciente di e riesgo y desventaha cu por presenta ora nos ta contrata hende cu no tin un compania registra na Camara di Comercio di Aruba.

E importancia di un compania registra

            Ora nos ta contrata un compania cu ta debidamente registra na Camara di Comercio, nos ta confia cu nos ta deal cu un entidad legal cu ta sigui regulacion y regla di gobierno. Un compania registra ta indica cu e autoridadnan a evalua y aproba su existencia, su capacidad y su credibilidad. Esaki ta duna mas trankilidad di mente cu e servicio cu nos ta ricibi lo ta di calidad.

Riesgo di contrata hende of companianan sin registracion

1. Falta di Seguridad y Calidad: Ora un persona no ta registra su compania, e no tin necesariamente e calificacion of experiencia necesario pa e trabou. E servicio por ta di menor calidad, y por hasta pone bo propiedad y seguridad na peliger.
2. Falta di Proteccion Legal: Contrata un compania sin registracion ta pone bo den un situacion di riesgo legal. Si algo bay fout, bo no tin ningun proteccion legal of recurso pa busca compensacion. Un contrato verbal no ta tene e mesun peso cu un contrato skirbi cu un compania registra.
3. Contribucion na Economia Informal: Ora nos contrata compania no registra, nos ta contribui na e economia informal. Esaki no ta beneficia nos pais, pasobra e compania no ta paga impuesto y no ta contribui na e desaroyo di nos comunidad.
4. Falta di Seguro: Un compania registra regularmente tin seguro pa cubri daño cu por sufri durante un trabou. Un compania sin registracion no tin ningun obligacion pa tin seguro, loke por lanta problema si algo bay malo.

E peliger di e rednan social

            Awendia, hopi di e servicionan aki ta wordo ofreci riba rednan social manera Facebook, Instagram, y WhatsApp. Aunke esaki parce facil y comodo, e peliger ta mas grandi, pasobra hopi di esnan cu ta ofrece servicionan no tin compania registra, no tin seguro, no tin documentonan pa ta legal na Aruba y tampoco nan no por garantiza un bon calidad di trabou.

            Relaciona cu esaki mester ta mas vigilante ora nos ta busca servicionan den e plataformanan aki y semper haci e investigacion necesario.

Kico nos por haci?

1. Mester haci bo investigacion: Prome cu contrata un compania, verifica si e compania ta registra na Camara di Comercio di Aruba. Bo por haci esaki facilmente online of bishita KvK.
2. Pidi referencia: Pidi referencia di otro clientenan cu a traha cu e compania. Verifica su reputacion y si nan a keda contento cu e trabou.
3. Firma un contract skirbi: Semper firma un contract skirbi cu ta detaya e trabou, cosnan chikito y cosnan grandi, condicion y termino di pago. Esaki ta duna bo mas proteccion legal.
4. Informa otro: Comparti bo conocemento cu famia, amigonan y coleganan. Promove contratacion di compania registra pa asina yuda cu e crecemento di e comunidad di negoshi na un manera safe y legal.

            Contrata companianan registra no ta solamente un acto di seguridad personal, pero tambe un contribucion na e desaroyo y prosperidad di Aruba. Hunto por logra un economia mas fuerte y un comunidad mas safe.