Dr. Nathalie Kingsale, Manager Behandelzaken:
*No por a yena vacature pa Psicologonan ainda
ORANJESTAD (AAN)—Dokter Nathalie Kingsale, Psikiatra Manager Behandelzaken na Respaldo, den un entrevista a admiti cu nan Departamento di Adulto si tin un lista di spera basta largo. No obstante, e Departamento di Mucha no tin lista di spera na e momentonan aki.
Kiermen, menornan di 18 aña si ta wordo yuda hopi lihe, Kingsale a bisa. Pero esnan mayor di 18 aña si tin cu warda, y esaki debi cu Respaldo tin diferente vacature pa psicologo y nan tin e vacaturenan habri pa basta tempo caba. AZV a aprob’e y nan a pone extra cen pa atrae profesional, pero nan no ta hayando solicitud pa esaki ainda.
Dr. Kingsale a agrega cu den e proximo lunanan, danki Dios, tin dos ta psicologo ta bay cuminza, pero ainda tin mas vacature habri.
Esaki ta un problema mundial, e Psikiatra ta indica. Na Hulanda tambe tin scarcedad di psicologonan. “Nos ta hasta ampliando nos vision pa wak si den e region nos por haya psicologonan, pero nos tin cu wak tambe calidad. Mi sa cu Zorg Academie na Aruba y Kwaliteit Institute Aruba ta wak ken ta e psicologonan cu ta registra na AruBIG. Pues, nos ta wardando tambe riba e desaroyo aki cual ta e psicologonan den region cu nos lo por tuma pa traha cu nos, cu nan calidad ta un tiki mas garantiza”, Dr. Kingsale a señala.
El a agrega cu nan ta buscando hopi mas na Hulanda y Belgica, pero na momento cu ta duidelijk cual ta e psicologonan den e region cu tambe ta wordo registra den AruBIG e ora Respaldo por cuminza atrae nan tambe.
