Contra dos sentencia di Huez y cu un caso di labamento di placa pendiente
*Mike a tene Benny den Parlamento cu placa di Pueblo como entrada
*Mester bini investigacion di loke a pasa na Aruba entre 2009 y 2014
ORANJESTAD (AAN) — Na 2009 Mike Eman oficialmente a haci su entrada den mundo politico di Aruba.
Asina tambe inicio a wordo duna na un epoca, cu 15 aña despues na 2024, mester wordo considera e temporada den cual politica populista, especializa y totalmente dirigi riba e forma mas elocuente pa haya voto, a bira realidad di Aruba cu awe ta paga un prijs caro pa e resultado.
Cu entrada di Mike Eman como lider di AVP na 2009, prueba a keda entrega con un lider politico por trapa cu dos pia riba e Ley mas importante pa garantisa bienestar financiero di un pais, cu ta e Ley di Contabilidad, cu a regla con mester atende cu placa di Pueblo.
E falsedad politico mas grandi den historia di Aruba, tabata e forma cu Mike a gana eleccion na 2009 cu e promesa cu e lo deshaci di BBO, pa na 2010 e mes publicamente bini dilanti pa splica Pueblo cu si e kita BBO, e ta hinca Aruba den desaster.
Mike Eman y su compinchinan den su Gobierno a ciega Aruba di tal forma, cu Reino mester a interveni pa pone fin na e wega politico destructivo pa bienestar di Aruba despues cu Mike Eman a sigura su partido un mayoria absoluto den Parlamento.
Propaganda falso pa e maneho destructivo di AVP pa Aruba, a laga Aruba den estado di bancarota, cu a haci cu Mike y su Gobierno a bay entrega refineria di Aruba na Nicolas Maduro, cu afortunadamente no a logra.
Pero ya na 2013, Pueblo di Aruba tabata baila mientras e suelo sagrado di Aruba tabata wordo entrega na Family and Friends di AVP.
Siman pasa Corte di Husticia a aumenta castigo cu ya Benny Sevinger a ricibi pa e maneho cu el a hiba cu terenonan di Aruba, cu segun veredicto di Corte di Husticia ta pio cu loke a bini dilanti den e prome sentencia di Corte den Prome Instancia.
Un pregunta grandi ta keda atras, si atrobe Mike Eman y AVP ta logra deshaci den practica di e sentencia di Corte di Husticia y splica cu mientras e caso ta andando, Benny Sevinger no mester bandona Parlamento y cumpli cu e sentencia di Corte di Husticia.
Benny Sevinger lo dicidi pa bay den Cassatie y asina sigui gana placa y tur beneficio di un Miembro di Parlamento of Benny Sevinger ta retira awor como representante di Pueblo, cu mensualmente ta wordo paga y asina tin placa tambe pa paga abogado?
Aki ta trata di un asunto sumamente serio pasobra den e veredicto di Corte di Husticia no solamente ta acusa Benny Sevinger di a bay contra Ley, pero tambe ta uza frasenan cu ta mustra cu Benny Sevinger a kibra e contenido di su huramento como Miembro di Parlamento ( y prome cu esey como Ministro) den cual el a bisa cu e no a priminti ningun hende nada.
Cu ayudo di Mike Eman y AVP, Benny Sevinger a logra keda den Parlamento di Aruba y asina ricibi e salario cu sigur ta yuda paga gasto di abogado den Corte den Caso Avestruz y e caso pendiente di labamento di placa.
Por bisa pues cu ta Pueblo di Aruba ta duna Benny Sevinger e placa cu e mester pa su defensa, como salario cu Mike Eman a exigi pa e ricibi como Miembro di Parlamento, cu a destrui imagen politico di Aruba.
Cualkier ciudadano no ta gana placa como Miembro di Parlamento pa paga su abogado y mantene su posicion cu biahe rond mundo paga pa Pueblo, manera Benny si por.
E pregunta grandi awor ta, Pueblo ta sigui paga salario di Benny Sevinger den Parlamento pa asina e tin entrada cu ta yuda pa e por paga abogado pa bay den Cassatie si e dicidi y den e otro caso cu Huez mester atende?
Cualkier ciudadano lo a haya su retiro na trabou y sigui reglanan pa tin un abogado manera nos sistema ta exigi.
Kico esaki ta haci cu e sentencia di Huez y di Corte di Husticia cu den e caso di apelacion a bay mas leu cu Huez mes? Kico esaki ta haci cu e sentido di Husticia den Pueblo?
Kico esaki finalmente ta haci cu e moral necesario pa politica, cu durante e periodo 2009 pa 2017 a entrega prueba con e por destrui un pais si politica pone e pais den man di populista politico, cu ta ciega y finalmente destrui un pais, manera Gobierno Mike Eman a haci cu Aruba?
Un pregunta manera miles di otro pregunta tocante gobernacion Mike Eman.
