Nederlands Letterenfonds ta bishitando Aruba pa amplia informacion riba subsidionan literario

Emma Stomp, Specialista di Comunicacion:

ORANJESTAD (AAN):  Representantenan di Nederlands Letterenfonds, Emma Stomp, Specialista di Comunicacion, y Lucette Châtelain, Specialista di Subsidio, entre e dianan 17 te cu 27 di mei, ta bishitando Aruba, Corsou, Boneiro, Saba, Sint Eustatius y Sint Maarten pa sostene y informa escritornan, traductornan, creadornan literario y organisacionnan cultural tocante e posibilidadnan di subsidio cu e fondo ta ofrece.

Nederlands Letterenfonds ta un fondo di Hulanda cu a ser estableci cu e meta di stimula, desaroya y sostene literatura den idioma Hulandes y otro expresionnan literario den Reino Hulandes. E fondo ta brinda apoyo financiero na escritornan, traductornan, editorialnan y proyectonan literario, y ta activo tanto na Hulanda como den e parti Caribense di Reino.

Segun Emma Stomp, e bishita na Aruba tin como meta principal pa acerca e comunidad literario cu e oportunidadnan cu awor ta disponibel. “Nos ta na Aruba pasobra Letterenfonds ta ofrece subsidionan tambe na e parti Caribense di Reino, incluyendo Aruba. Escritornan, traductornan y organisacionnan literario por aplica pa subsidio cerca nos. Nos ta reuni cu nan y splica con nan por haci esaki.”

E sesionnan informativo ta dirigi na un grupo amplio di profesional creativo, incluyendo escritornan, poetanan, traductornan, editorialnan y organisacionnan cultural di Aruba. Segun Stomp, e programa ta cubri tur seis isla di Caribe Hulandes.

Durante nan estadia di dos dia na Aruba, Stomp y Châtelain a tene diferente reunion cu creadornan literario y representantenan di organisacionnan cultural pa compronde miho kico e sector local tin mester. “Asina nos por coordina miho kico exacto ta haci falta na Aruba y den e region. Nos ta hopi contento cu nos por a papia cu tanto hende na Aruba”, señora Stomp a expresa.

For di 2024, Nederlands Letterenfonds a amplia su posibilidadnan di aplicacion specificamente pa e region Caribense di Reino. Segun Stomp, hopi creador conoce e fondo caba, pero ainda tin hende cu no ta completamente informa riba tur e oportunidadnan disponibel.

“Nos ta spera cu despues di e presentacionnan aki, mas persona lo aplica pa subsidio. Hopi hende ya conoce nos, pero ainda tin hopi mas cu nos por ofrece. Nos kier pa e comunidad creativo ta miho informa tocante tur e opcionnan di subsidio cu Letterenfonds tin disponibel”, el a expresa.

E bishita di Nederlands Letterenfonds ta wordo mira como un paso importante den fortalecemento di literatura, traduccion y expresion cultural na Aruba y den henter Caribe Hulandes.