Meta di Nederlands Letterenfonds ta pa fortalece lectura y literatura na Aruba

Lucette Châtelain, Specialista di Subsidio:

ORANJESTAD (AAN): Lucette Châtelain, Specialista di Subsidio di Nederlands Letterenfonds, hunto cu Emma Stomp, Specialista di Comunicacion, ta bishitando e islanan di Reino den Caribe cu e meta di amplia informacion tocante e posibilidadnan di subsidio pa literatura, lectura y proyectonan cultural den Caribe Hulandes. 

Durante un encuentro informativo cu creadornan local, organisacionnan cultural y otro interesadonan na Aruba, Châtelain a splica cu e meta principal di Nederlands Letterenfonds ta pa logra y apoya mas persona na Aruba y na e otro islanan di Reino Hulandes. 

“Nos meta ta pa yega na mas hende di e islanan, incluyendo Aruba. Nos kier comparti informacion riba tur e posibilidadnan di subsidio cu nos ta brinda. Nos ta mira literatura di Aruba y di e islanan como algo hopi importante y nos kier contribui na dje,” segun Châtelain. 

E fondo ta enfoca principalmente riba literatura y proyecto relaciona cu buki y lectura. Esaki no ta limita solamente na publicacion di bukinan, pero tambe festivalnan literario, storytelling, spoken word, poesia, guionnan y actividadnan educativo pa stimula mucha y hobennan lesa. 

Segun Châtelain, e caida den interes pa lesa ta un realidad tanto na Hulanda como na Caribe Hulandes. “Nos ta mira cu cada biaha menos hende ta lesa, specialmente muchanan. Tin hopi competencia di medianan social, streaming y otro medio digital. Pero investigacion ta mustra cu lesa bon ta contribui enormemente na bida di un persona, na su carera y incluso den compronde cosnan practico manera documentonan oficial of di impuesto.” 

E representante di Nederlands Letterenfonds a enfatisa cu literatura por tuma hopi forma moderno. Aunke e forma tradicional ta e buki, tambe por tin literatura den video, spoken word, teatro of naracion digital. “Tur cos ta cuminsa cu un bon historia of un bon guion. Literatura no tin un solo forma”, el a expresa. 

Châtelain a splica cu Nederlands Letterenfonds ya ta apoyando diferente fundacion y creadornan den Caribe Hulandes, y cu nan ta spera di amplia e red ainda mas den e añanan benidero. “E meta di awe ta pa laga hende sa cu nos ta aki y cu nan por bin cerca nos cu nan idea of proyecto. Cu gusto nos lo yuda nan sigui desaroya esakinan”, el a duna di conoce. 

E subsidionan ta disponibel pa creadornan individual, traductornan y organisacionnan cultural durante henter aña, incluyendo proyectonan enfoca riba scolnan, promocion di lectura y desaroyo cultural den comunidad.