Carolina Thiel-Span, presidente di FAA
ORANJESTAD (AAN) – April ta conoci como Luna di Autismo, y Dia 2 a keda celebra e Dia Mundial di Autismo. Den entrevista cu Carolina Thiel-Span, Presidente di Fundacion Autismo Aruba (FAA), den entrevista cu DIARIO a bisa cu semper nan ta para keto riba puntonan importante, y tambe pa enfoca riba locual mundialmente nan ta mira como problematica of como un punto di atencion.
Fundacion Autismo ta traha cu organizacionnan internacional, y e situacion na Aruba, mescos cu mundialmente, cu mas conocemento ta wak cu hopi persona ta buscando (hoben of adulto) un diagnostico pa autismo y esey kiermen cu e necesidad pa sosten y recursonan pa personanan (adulto y mucha) cu autismo tambe ta creciendo.
Esey tambe ta haci cu tin un pregunta grandi cerca e fundacion y su rol den esaki ta corda tur hende cu na April su rol ta pa informa y concientiza ademas di purba yega na solucionnan estrategico y structural, pa loke ta Aruba.
“Pues e luna aki no ta diferente. Nos ta bay participa na diferente ocasion pa por duna informacion, cuminzando na April caba nos a haci diferente entrevista, combersacion unda nan a splica cierto cosnan na un forma amplio pa hende compronde”, Carolina Thiel a menciona.
El a agrega cu Diasabra e fundacion a participa na e “One Healthy You Festival”, unda cu e publico a bin busca informacion y nan a comparti tur nan materialnan nobo, pues nan a zorg pa na April saca un guidebook pa mayor, e manual pa maestronan, entre otro. Nan ta creando productonan cu hende por yega haya y uza.
E fundacion a traha cu studiantenan di ultimo aña di IPA pa crea un material cu ta wordo uza den IPA, pa esnan cu ta birando maestra y cu ta un material facil pa uza den klas y na tur momento. Nan kier sigui crea un comunicacion habri cu scolnan.
