Benny Sevinger a perde su salario como Miembro di Parlamento
*Lugar di prueba y peso di castigo den sistema democratico
*Huez a kita e derecho di Benny pa sirbi como cara di Aruba
ORANJESTAD (AAN) — Democracia ta nifica felicidad ta hende. Democracia ta exigi pa e felicidad y bienestar di hende conoce defensa na tur momento y cu husticia ta wordo haci cu hende.
Esaki ta e motibo cu e sistema di Husticia na un pais, conoce dos parti. E parti di acusacion y e parti di defensa cu ta completamente basa riba loke ta skirbi den Ley.
Ora papia di un pais democratico, ta papia di un Estado di Derecho loke ta nifica cu na e pais ta Ley (Derecho) ta dicidi.
Democracia ta regla pa medio di ley. Directamente loke ta bon y loke ta malo y ningun instancia por pone su mes riba ley.
Ningun hende ta riba Ley, ni Gobierno, ni Parlamento, ni autoridad, ni Huez.
Ya cu tur hende por ta pecador y por faya na cualkier momento, e sistema democratico no ta laga hende sin defensa hasta enfrente di un solo Huez, pero ta habri caminda pa e hende bay contra loke un solo Huez a dicidi y busca veredicto di Corte di Husticia, caminda mas cu un Huez ta dicidi.
Si ainda e hende no ta satisfecho, e por bay den Cassatie, loke ta realmente Corte Supremo di Husticia, cu ta investiga si Ley a wordo mantene den henter e proceso tanto di parti di e acusador como di parti di e persona of instancia cu ta defende su mes.
Mester tene cuenta si, cu si un persona apela su sentencia den prome instancia, e por wordo confronta cu un castigo mas halto dor di Corte di Husticia mientras e proceso por wordo semper coregi den cassatie.
Den sector di Husticia, hustamente pa evita problema serio, personanan cu ta representa Husticia na tur forma, ta aplica Ley.
Den un caso civil, dos partido ta opone otro y hasta ta asina cu un persona cu no por carga e castigonan di su defensa, ta haya defensa gratis enfrente e otro cu si por paga.
E balansa di igualdad di tur hende den bista di Husticia, semper mester wordo mantene segun leynan basico di e pais.
Huez no por duna sin mas interpretacion na un caso basa riba loke ta bini dilanti. Mester tin prueba pa dicta sentencia den tur caso tanto civil como penal.
E pruebanan mester cumpli cu exigencianan legal cu ta duna atrobe seguridad cu e derechonan di un persona ta wordo respeta.
E sistema di Justicia ta afecta un persona directamente y na paisnan dictatorial, ta wordo abusa pa asina trapa riba derecho humano di un persona.
E peso di un sentencia pa e persona cu wordo declara culpabel, ta afecta su bienestar den tur sentido.
Pues Huez mester di prueba pa establece kico a pasa y pa evita cu un inocente ta wordo castiga pa loke e no a haci cu ta nifica cu un hende cu ta inocente, mester carga e peso di castigo cu ta afecta su bida na tur forma.
Den e caso di Benny Sevinger, tabata tin diferente aspecto pa cual a persigui su persona manera labamento di placa. E acusacion aki no por a wordo proba segun Huez, cu si a bay di acuerdo cu Benny Sevinger a acepta soborno entre otro.
Den e caso di e otro acusadonan por a mira con tabata tin acusado, cu a comete mas crimen cu solamente paga Benny un suma bou mesa.
Benny Sevinger no a liber. E no a haya solamente castigo di prison. Benny Sevinger a perde su entrada den Parlamento di Aruba, cu e no por cobra mas pasobra e no por traha como Miembro di Parlamento di Aruba.
El a perde su lugar riba lista di AVP por lo pronto. Huez a bisa cu e no ta cualifica pa representa Pueblo di Aruba pasobra el a mishi cu bienestar y reputacion di Aruba.
El a afecta e bon nomber di Aruba y a percura pa un actitud negativo di entre otro inversionistanan.
Husticia ta base di felicidad di un pais y un hende. E peso di un castigo ta sumamente grandi y tin resultado na tur forma pa un persona.
Huez mester aplica Husticia a base di Ley cu ta exigi prueba di su persona pa asina democracia por triunfa pa tur hende, incluso e persona cu ta bay prison, pero mester ricibi un trato humano den prison.
