Tisa LaSorte CEO di AHATA:
ORANJESTAD (AAN) – Tisa LaSorte, den entrevista cu DIARIO, a señala cu un di e esfuerzonan di Aruba Hotel and Tourism Association (AHATA) pa atrae mas trahador den e sector di hospitalidad, ta su campaña “Ami ta turismo”.
E meta di e campaña aki ta pa inspira orguyo pa e trabaonan cu tin den e sector, y pa demostra cu tin hopi hende cu ta orguyoso di nan trabao y cu tin un carera exitoso.
LaSorte a indica cu semper AHATA tin combersacionnan cu Departamento di Labor, DPL, DIMAS y cu scolnan, pa sa kico AHATA por haci y con e dunadornan di trabao por apoya e esfuerzonan aki.
E dama a menciona cu aña pasa Minister di Labor a bisa cu na Aruba tin hopi persona indocumenta, pero cu si nan pasa un trayectoria legal, nan por haya permiso di trabao y asina kita nan for di mercado preto pa nan drenta den e mercado legal.
AHATA ta apoya esaki completamente y ta trahando cu Gobierno pa mira con nan por facilita e trayectoria aki, y nan ta trahando cu organizacionnan manera HIAS, pa wak con nan por tin un sistema pa haya e tipo di candidatonan pa traha den hospitalidad.
Asina AHATA ta purba yuda haya hende di afo pero cu ta na Aruba caba pa yuda reforza e tipo di trabaonan cu ta habri, y cu no tin suficiente hende na Aruba pa haci e trabaonan aki.
“Nos tin hopi esfuerzo ta bayendo pareu y awo nos ta wardando pa wak e fruto di e esfuerzonan ey”, Tisa LaSorte a señala.
El a agrega cu ora el a papia cu e miembronan di AHATA, y ta puntra nan kico ta nan preocupacion cu nan ta keda cune anochi, ora nan bay drumi, nan ta contesta cu na prome lugar e impuestonan cu a subi, loke ta nifica cu e gastonan di operacion a aumenta masha hopi mes, y na di dos lugar, cu tin scarcedad di hende pa haci e trabao.
E problema cu esaki ta cu no por brinda e servicio cu e calidad cu nan ta desea pa e wordo duna. Y no ta di hotel so, pero AHATA ta scucha esaki di diferente otro lugar di sector di horeca.
