Na forma grandi a gradici Thessaly Zimmerman pa e gran logro na Miss Universe na Israel

El a logra uni pueblo di Aruba

ORANJESTAD (AAN): Diadomingo anochi, tabata uno special ora cu Thessaly Zimmerman a despedi di su reinado como Miss Universe Aruba 2021.

   Bisti den un trahe fenomenal, cu su sonrisa inigualable riba su cara, e beyeza local cu a logra sali den e Top 10 muhernan mas bunita y inteligente den certamen di Miss Universe 2021 na Israel, a haci su ultimo caminata riba escenario di Crystal Theatre na Renaissance Mall, durante un actividad organiza pa Star Promotion pa anuncia e Miss Aruba nobo.

   Ministro Ursell Arends a hiba palabra, y a el a gradici Thessaly Zimmerman pa e gran trabao cu el a haci como Miss Universe Aruba 2021, y el a bisa cu e isla ta sumamente orguyoso di Thessaly su logro.  El a bisa cu e ta sigur cu tur e experiencia y e momento cu Aruba a biba ora su nomber a wordo menciona den e Top 10 finalistanan di Miss Universe 2021 na Israel, cu tur hende a sinti nan mes orguyoso di ta Arubiano, y sigur e alegria di mira e pais, con chikito cu e por ta, wordo nombra den e finalistanan riba escenario internacional di beyeza, cu ta Miss Universe.

   Ministro a gradici Thessaly pa a hiba e mensahe importante di ‘Salud Mental’, cu sigur despues di un pandemia di cual ainda ta sinti efectonan di dje, pa ta un persona kende a demostra cu determinacion, disciplina, y principalmente actitud humilde, bo por logra yega leu.

   El a bisa cu tin di duna danki na Thessaly pa tur loke el a bin ta haci pa Aruba, y tambe pa tur e inspiracion na e hobennan cu ta, y cu lo kier bay representa Aruba.

   El a bisa un palabra di pabien na Star Promotion pa e evento, unda por gradici e Miss Universe Aruba saliente.

   E caminda di Thessaly: Posteriormente Thessaly Zimmerman tambe a haya chens di dirigi su mes na publico, y el a enfoca riba tur e ruta largo cu e mester a cana pa por a logra yega na participa na Miss Universe na December 2021 na Israel.

   El a sinti cu su Bachelor’s Degree e tin un bon educacion pa representa Aruba na e certamen.  El a admiti cu e trayectoria di su estudio no tabata facil, e no a cab’e den 4 aña pero esey ta OK.  Simplemente e no a rindi y a sigui lucha, te ora cu el a logra su papel, y cu orguyo a representa Aruba.

   E sa di tur e dificultadnan e isla a pasa cu Covid-19, y esey tabata un obstaculo tambe cu casi a pone keda sin bay e certamen na Israel.  Thessaly a splica cu e pais ta exigi pa tur candidata cu yega eynan, mester tin caba un Booster-Shot di e vacuna contra Covid-19.

   Thessaly a splica cu el a viaha bay Curaçao pa busca su Booster-shot, y a admiti cu por poco el a viaha te New York pa haya esey.  Finalmente aki mes el a hay’e.  E tabata e impulso cu a yude bay Israel, demostrando asina cu nada lo no strob’e di e soño pa su participacion den Miss Universe bira realidad.

   Esey ta algo cu ta importante pa un ser humano!  Si bo kier algo, djis enfoca bo mente riba dje y bay su tras!  Nunca laga otro persona bin bisabo cu bo no por logra.

   Si acaso ningun hende tey pa sostenebo, corda cu abo mes tey y bo por duna bo mes e empuhe.  Cu tur esey, bo por stimula otronan pa yudabo tambe.  Esey ta un tiki di su experiencia pa e motivacion pa bay e certamen.

   Corda cu no ta tur cos den bida ta facil, pero e ta orguyoso cu despues di 25 aña, porfin un candidata di Aruba a logra yega atrobe den Top 10 di e certamen di Miss Universe.

   Aki ta unda cu publico presente a dune un aplauso grandi, y mesora e sonrisa grandi riba cara di Thessaly tabata un muestra cu e ta apreciando esaki.