Divi Impact Foundation a entrega certificado na 209 yiu di empleado pa 'back to school' y seis 'scholarship'

Presidente di e fundacion Ricardo Vrolijk:

ORANJESTAD (AAN) – Ricardo Vrolijk, Presidente di Divi Impact Foundation, den un entrevista cu DIARIO a duna informacion tocante e entrega di certificado cu a tuma lugar na final di Juli, na yiunan di empleadonan cu a solicita pa un asistencia pa “back to school”.

Ta bon si pa splica con Divi Impact Foundation ta haya su fondonan. Ta asina cu cada trahador y e compania ta duna un aporte.

“Divi Impact ta cuminza unda cu e trahadornan ta aporta un contribucion chikito di nan salario, tur luna y e total di e suma eynan e compania, e hotel pa cual e persona ta traha, ta pone un suma acerca. Aworaki nos tin mas entrada door cu e guestnan semper ta pendiente di locual e resort ta haci y door di esey nos a crea locual nos ta yama ‘Dollar a day donation’ cu ta bin directamente di e turistanan cu ta keda na Divi Tamarijn all inclusive”, Vrolijk a señala. El a agrega cu na Divi Golf nan ta bendiendo e balanan di golf, cual contribucion ta bin pa e fondo tambe, ademas tin guestnan ta bin entrega articulonan escolar, manera tas, entre otro, y esaki ta wordo duna durante e “back to school”.

Durante e actividad, e muchanan cu a pidi asistencia a haya uniform, articulonan escolar y ademas e aña aki a otorga seis scholarship, pa tres studiante localmente y tres cu ta studiando afo caba.

E atardi aki tabata tin e prome encuentro anual di Divi Impact Foundation, unda nan a invita tur e miembro y no miembronan cu ta traha den e propiedadnan di Divi Resorts, pa nan wak kico e fundacion a haci den e tres ultimo añanan, den e comunidad. “Nos a haci basta donacion y asistencia y awe tardi nan por wak kico nos ta haci den nan nomber, pasobra ta danki na e trahadonan cu ta aporta y tambe e companianan cu ta join na e contribucion, cu ta haci e proyecto aki posible”, Ricardo Vrolijk a subraya.

El a agrega cu ta trata aki di 339 miembro, di cual 209 muchanan cu ta hayando asistencia, a ricibi certificado y seis scholarship.

E fundacion tin mas evento den planning cu ta mas bien pa sali den comunidad, y ora nan ta concretiza lo informa tocante esaki, señor Vrolijk a indica.