Na Biblioteca tin e Exposicion Biba Natura-Lesa

ORANJESTAD (AAN): Na november biblioteca ta presenta un exposicion di grupo den cuadro di su Festival di Buki pa Mucha.

Tema ta ‘Biba Natura-Lesa!’. Esaki ta un exposicion di un grupo di 20 artista, artesano y fotografonan. Biblioteca a pidi e grupo pa participa cu un obra cu ta un expresion di e tema.  E grupo meta ta mucha di tur edad. E exposicion a habri di siman pasa caba entre 5or y 7or y ta keda habri te cu diabierna dia 2 di december. E exposicion ta pa mucha pero adulto tambe ta bon bini!

            E obranan ta pone un focus special riba bunitesa di naturalesa, e amor pa naturalesa y e necesidad pa cuida nos naturalesa den un manera cu mucha por comprende y aprecia. Un mencion special pa artista Paul Wong cu a ilustra e buki pa Festival di Buki pa Mucha y cu ta obtenibel na libreria como e Regalo di siman. Lo tin muestra di e buki den exposicion aki.

            Participantenan di Exposicion ‘Biba Natura-Lesa!’ ta: Ad Rekkers, Anita Huygen, Carmen Tujeehut, Gina Jie Sam Foek, Ilse Knijn, Janine Flanegin, Cream of Wu, John Gray, Alumnonan di FAMA cu ta haya les di King Lie Kwie, Alumnonan di EduArt cu ta haya les di Natusha Croes, Nimia Geerman, Omaira Silva, Paul Wong, Robby Solognier, Roelie Groenewegen, Sheila Werleman, Sjoerd Canninga, Vanessa Paulina y Yndirah Luydens.

            E exposicion ta den Sala di exposicion di biblioteca na Playa. Actividadnan di atardi pa mucha ta tuma lugar akinan di 3or pa 4or den siman di 7 pa 10 di november.