Momento a yega pa tur hende cuminza deposita Plastic den forma apart

ORANJESTAD (AAN): Reduci nos uso di plastic ta un di e pasonan mas importante pa proteha nos medio ambiente y naturalesa.

Pakico? Pasobra nos tur sa cu e impacto di desperdicio di plastic ta un di e retonan mas significante di nos generacion cu tur pais ta enfrentando.

   Door di reduci uzo y recicla locual nos no por evita di usa por reduci e cantidad cu ta yega na un landfill, of tambe e cantidad cu ta drenta nos naturalesa y  lama.  

   Aruba ta un isla rondona pa lama. Basa riba datos cientifico, nos tambe sigur tin un responsabilidad pa minimalisa nos impacto pa mehora e situacion mundial. E realidad ta cu aunke nos isla no ta produci plastic, si nos uso di plastic ta halto, y hopi plastic di Caribe ta yega nos costanan mescos cu nos uso y desperdicio di plastic tambe ta yega costanan di otro islanan of paisnan via lama.  

    Con ta distingui e diferente desperdicio di plastic: Tin varios tipo di plastic cu ta worde aplica pa traha diferente tipo di producto. Por ehempel, Polyethylene terephthalate (PET) ta un di e tipo di plastic mas comun cu por recicla. Kinan por pensa di por ehempel botter di awa, juice, refresco (of bebida en general), baki di cuminda (food containers) y otro productonan similar. 

    High-density polyethylene (HDPE) ta un otro tipo di plastic cu por ser recicla. HDPE ta ser uza pa botter di por ehempel lechi, shampoo/conditioner, y ta un plastic mas duro. HDPE tambe ta ser uza pa cierto material di construccion di plastic. 

   Pa aumenta e grado di reciclahe di plastic e mester ta limpi y no contamina. 

   Unda comunidad por entrega plastic:  Plastic tin un costo pa procesa, pero e impacto positivo riba nos medio ambiente y naturalesa, no tin prijs! Por deposita plastic na e proximo lugarnan actualmente:

(*) Plastic Beach Party (Recycling).

(*) Ecotech Freezone (Export di algun tipo).

(*) AruPro (Reusa exclusivamente su productonan).

   Door di reduci y recicla mas, nos por baha nos impacto negativo riba medio ambiente. Recicla plastic tambe ta tuma menos recurso natural y energia compara cu crea plastic nobo. Pues tin un beneficio economico cu mester ser explora den futuro. Na e momento aki nos ta conta cu boluntad di e personanan cu kier contribui na haci un impacto positivo, pa separa y deposita nan plastic na un di e companianan. 

   Pa mas informacion tocante desperdicio di plastic por tuma contacto cu e companianan of bishita website www.trashtocasharuba.org pa asina haya un bista di e Blue Print pa maneho di desperdicio.