Concientizacion pa derecho nan di bestia:
ORANJESTAD (AAN): Manera cu DIARIO a trece dilanti siman pasa e bunita informacion di un trabao fenomenal pa yuda concientiza comunidad riba cuido y derecho cu cachonan y pushi tin riba e isla, y ta na encargo di e simpatica Tara van der Werk, kende ta e actual Miss Teen Aruba International 2025, y cu awor tambe ta e Arubiano Brand Ambassador nobo.
DIARIO a compronde cu pa celebra e 15 aña di e marca local ARUBIANO Awareness brand, Tara a splica cu nan lo dedica un campaña di concientizacion pa proteccion, cuido y derecho di cacho- y pushinan na Aruba.
Hunto cu e marca Arubiano, Tara lo traha duro pa yuda promove esaki, pa cambio pa tur nos animal nan, esun nan cu ta worde abusa, esun nan cu ta biba riba caya desde cu nan ta chikito of esun nan cu a worde bandona, y tambe esun nan cu ta biba den shelter y ta wardando un hende pa bin adopta nan.
Tara a splica cu e luna aki mi e ta un boluntario na Veterinaire Kliniek Aruba, y su experiencia tabata espectacular. Cu su mesun wowo el a mira con duro e veterinarionan ta traha pa yuda e mascotanan cu pueblo tin na Aruba. Incluso el a mira e amor cu hende tin pa nan mascota.
“E no ta un trabou facil, pero uno hopi bunita si. Mi a wak algun caso tristo, pero varios caso bunita tambe, caminda e mascotanan a bay for di hopi malo bek pa salud completo, danki na e tratamento cu e veterinario a duna nan. Mi a wak diferente cacho, sea agresivo, lief, y ancioso, y mi por a mira cu tur a wordo trata cu mesun respet y amor.”
Diabierna atardi Tara a hasi donacion di pechinan di Arubiano caps na e kliniek. Esaki ta pa yuda recauda fondo pa por atende e persona nan cu menos recurso cu mester atencion medico pa nan mascota.
Mirando esaki, Tara a continua: “Mi ta haya pica pa e animalnan cu ta biba riba caya sin tin un cas como nan hogar y un doño na ken nan lo por ta fiel. Nan tambe merece e amor y cuido cu e mascotanan cu mi a mira durante e luna aki ta haya. Ademas nan tambe ta animalnan cu tin sentimento y nan tambe por expresa nan fidelidad.”
Segun Tara, pesey pueblo mester por traha hunto pa yuda e animal nan aki. Aki el a duna ehemplo di loke comunidad por haci. Pueblo por:
(1) Enfoca pa ta doñonan di mascota responsabel y ofrece nos mascotanan amor y seguridad.
(2) Apoya e fundacionnan cu tin na Aruba door di adopta pushi of cachonan crioyo y asina duna e animalnan riba caya un oportunidad pa ta parti di un hogar yena cu amor.
(3) Raporta casonan di abuso contra cacho of pushi na instancianan oficial pa e casonan por wordo atendi debidamente.
Tara van der Werk a finaliza bisando: “Hunto nos por haci hopi pa nos mascotanan y esun nan cu mester un hogar ainda.”. DIARIO ta admira e perseverancia y e dedicacion di Tara den e tarea aki. Hopi bunita tur esaki ta.
Pronto DIARIO lo trece dilanti mas informacion educativo pa yuda cu e concientizacion, incluyendo bishitanan di Tara na diferente animal shelters y fundacionnan riba e isla.
