ORANJESTAD (AAN): Minister Mirjam Sterk (Cuido di Largo Plaso, Hubentud y Deporte) lo participa awe Diaranson, 19 di november,
den e Consulta Gubernamental di Cuater Pais di Salubridad Publico, hunto cu e ministernan di Aruba, Corsou y Sint Maarten. Minister Sterk lo liderá e delegacion di Hulanda Europeo y Hulanda Caribense. E Consulta di Cuater Pais tocante maneho conhunto di salubridad den Reino Hulandes ta tuma luga e aña aki na Aruba.
Ora e yega na Aruba, e minister lo reuni cu e miembronan di e delegacion di Hulanda Caribense: Diputado di St. Eustatius Reuben Merkman, Diputado di Saba Eviton Heyliger y Diputado di Boneiro Timoteo Silberie. E reunionnan aki ta pa preparacion pa e Consulta Gubernamental di Cuater Pais tocante Salubridad Publico.
Prome cu e Consulta Gubernamental di Cuater Pais riba diaranson, e minister lo reuni cu Mervin Wyatt-Ras, Minister di Salubridad Publico, Asuntonan Social, Cuido pa Mayornan y Adiccion di Aruba; cu Claret Connor, Minister di Salubridad Publico, Desaroyo Social y Labor di Sint Maarten; y cu Tyron Boekhoudt, Minister di Salubridad, Medio Ambiente y Naturalesa di Corsou.
Riba Diabierna, e minister lo reuni cu Mike Eman, Minister Presidente di Aruba, y Gerlien Croes, Vice Minister Presidente. Despues di esaki, e lo reuni cu Alfonso Boekhoudt, Gobernador di Aruba. Ademas, e lo bishita e Hospital HOH y ImSan pa haya un miho bista riba e desaroyonan dentro di e cuido di salud den e di dos liña na Aruba. E bishitanan aki ta tuma luga tambe cu atencion pa e habitantenan di e islanan BES. Riba diasabra, e titular hulandes lo tin un combersacion cu Frits Goedgedrag, presidente di e Comision di Salud di Caribe Hulandes.