Pasobra conseho di Mediador ta wordo sigui: - ORANJESTAD (AAN) – Minister Presidente Evelyn Wever-Croes, a referi na e problema di SKOA, tocante e situacion di e werksternan cu e Stichting tin den servicio.
E mandatario a bisa cu e por a tuma nota cu ultimo tempo, tabata tin un disputa entre SKOA y e minister di enseñanza.
“Esaki a pone cu e futuro di e personal di limpieza, cu ta traha pa SKOA y cu nos ta yama werkster, ta core peliger. Esaki ta algo cu nos di Ministerraad no tabata kier ningun momento. Nos ta den e pandemia! Nos ta den un pandemia cu a afecta nos pais, y gobierno ta haciendo su maximo esfuerzo pa mantene tur hende na trabao.
“Pa mantene tur hende den sector publico, na trabao, berdad mester a entrega un poco di e placa pa por a segura cu bo ta keda na trabao, y nos a purba tambe mantene mas tanto hende di sector priva, na pia di trabao. Pues, den e maneho aki di gobierno, nos esfuerzo ta pa evita cu hendenan ta perde trabao.
“Den e caso aki, pa evita cu e personanan aki cu ta traha na SKOA perde trabao, y mirando e disputa cu a resulta den un impasse entre e minister di enseñanza y SKOA, Ministerraad a dicidi di pone esaki den man di Mediador di Gobierno.
“Nos a pidi Minister encarga cu Labor, Glenbert Croes, pa por fabor involucra Medidador di Gobierno, pa asina por sali for di e impasse aki, cu nos ta hinca aden” Minister Presidente a duna di conoce.
Mediador di Gobierno a presenta su conseho y a duna dos diferente opcion, y aworaki e consehonan ta den e fase final riba e dos opcionnan aki, cual pa scoge”, Prome Minister a declara.
E mandatario a sigui splica cu Mediador a propone pa no retira e personanan aki (werksternan) for di trabao. El a subraya cu ambos opcion ta wordo studia.
“Mientras tanto, mi a reuni tambe cu e minister di finanzas Xiomara Maduro, minister di asuntonan social Glenbert Croes, y hunto nos ta trahando riba e opcion pa asina, no tin nodi retira ningun hende for di SKOA.
“Pues di akinan y esaki ta un mensahe cu mi a duna SKOA ayera, por fabor no retira ningun hende for di trabao (pasobra SKOA ta esun cu tin cu retira of busca hende) pasobra e conseho di Mediador ta bay wordo sigui y por keda trankil, pasobra ningun hende ta bay perde trabao”.
E mandatario a haya importante pa trece e asunto aki dilanti, den conferencia di prensa, mirando cu diaranzon esaki tabata hopi den noticia, anto pa trece trankilidad den e situacion aki.
“Mi tin cu bisa cu SKOA ta un di e partnernan mas grandi y hopi importante, den e cadena di enseñanza, y loke nos kier aworaki ta stabilidad y trankilidad den henter e veld di enseñanza”, Premier Wever-Croes a remarca.
