Aruba a sinti cu no ta un politico pero un gobernante nacional a papia
ORANJESTAD(AAN): Cu su estilo simpel, dirigi na tur miembro di comunidad sin distincion, Diahuebs anochi Prome Ministro Wever-Croes a dirigi su mes na Aruba den un discurso nacional.
Cu poco palabra el a mustra cu awe dia di eleccion, ta un dia di gran importancia pa democracia. E sentido cu un lider a papia cu e nacion cu el a dirigi durante momentonan historico marca tambe pa un pandemia mundial, a resona den e palabranan bon formula.
Satisfaccion pa e forma cu Pueblo di Aruba a logra tene e contagio di Covid-19 abou a bini dilanti den palabranan di e Prome Ministro di Aruba, cu a splica con Aruba a duna mundo prueba di por traha hunto cu bon resultado. Mientras el a pidi Pueblo pa sigui cuida den e pandemia, el a papia di logronan y di recuperacion na un forma simpel y sin promesa politico. El a mustra cu Aruba por spera continuacion di recuperacion loke lo nifica regreso na condicionnan social cu a worde entrega den pandemia.
Hunto lo logra, tabata e palabranan di Evelyn Wever-Croes cu a pidi Dios bendiciona Pueblo di Aruba.
