ORANJESTAD (AAN) — Den conferencia di prensa di gobierno, Dialuna ultimo, Minister Presidente a elabora riba e caso Avestruz.
Aki tin dos punto cu pa e mandatario ta importante: un ta e tema di corupcion y integridad, e otro ta e tema di tereno y Departamento di Infrastructura y Planificacion “DIP”.
E dignatario a cuminza pa splica kico ta Avestruz.
“Avestruz ta un investigacion di Ministerio Publico cu a cuminza ya caba, un par di aña pasa, pasobra na October 2019 ya nan tabata tin e prome entrada hudicial, y eynan nos tur como ciudadano a ser conoci cu tin un caso di investigacion cu yama Avestruz”, e mandatario a subraya.
E investigacion aki ta riba e periodo 2009 pa 2017, riba negoshi cu tereno di gobierno. “E ta un investigacion si ta mira cu den e tempo ey, durante gobernacion di Mike Eman II, di AVP, specialmente e rol di ex-minister Benny Sevinger, tabata tin soborno, falsificacion di documento, of labamento di placa. Si un of mas compania por a haya un tereno of un opcion riba base robes, y ta investiga e rol di ex-minister Benny Sevinger, den tur esaki”, Minister Presidente a señala.
El a enfatiza cu nan ta investigando si tabata tin negoshi cu tereno. Si terenonan destina pa hendenan traha cas of pa hendenan por a haci un negoshi na Aruba, a wordo duna na otronan a cambio di placa pa erikece algun y asina perhudica otronan, y ta importante pa investiga e rol di ex-minister Sevinger, den dje.
E mandatario a reitera cu na October 2019 tabata tin e prome entradanan hudicial, y asina normalmente na Aruba e pueblo ta ser conoci cu un caso asina. Entre otro a drenta den e cas di e ex-minister y mas hende cerca di dje den su circulo.
“ Despues di October 2019 e cosnan a keda basta trankilo y na Januari di e aña aki a cuminza cu mas entrada hudicial, entre otro, na cas di ex-minister Benny Sevinger atrobe, y e biaha aki el a continua te cu varios detencion a cay di esnan cu ta hopi cerca den e circulo di e ex-minister menciona. Esaki ta e caso Avestruz di 2009 te 2017 y ki envolvimento e minister por tabata tin”, Minister Presidente a reitera.
E dignatario a sigui bisa cu esaki no ta e prome caso di corupcion cu ta azota e gobiernonan di Mike Eman. “Pero importante ta pa na e momentonan aki, nos para keto na dje, y mira con cada un di nos ta para, pa loke ta trata e tema di corupcion y integridad den gobernacion. Pasobra e ta un tema hopi importante. Y mi ta kere cu esaki ta bay defini e siguiente eleccion. Ta hopi importante pa tur partido politico expresa nan mes con nan ta para pa e tema aki. Con importante integridad den gobernacion ta pa cada partido politico y expresa bo mes tambe, kico ta bo opinion riba e hecho cu tin un ex-minister bao investigacion, pa algo asina”, Minister Presidente a remarca.
