ORANJESTAD (AAN) — Awe mas cu nunca autoridad rond mundo ta sumamente alerta cu loke por pasa muchanan.
Nacionnan Uni a decreta Derechonan di Mucha, cu hamas por wordo permiti pa wordo pone den situacionnan peligroso, aunke nan propio mayornan ta permiti esaki.
Na e momento cu a bira conoci cu Gilbert Webb lo a trata di drenta politica, ya Aruba a cuminsa papia. Pero hamas Aruba por a pensa cu partidonan politico, cu kier haya mas restzetel y asina kier mas participacion di partidonan chikito cu segun nan lo no haya asiento, lo a yuda Gilbert Webb.
Pa basta tempo Gilbert Webb Lejuez a logra keda rondona pa silencio, mientras su actividadnan tabata continua. Su ansia pa bira Prome Ministro a habri caminda pa awe Aruba bolbe na e base di nos sistema democratico, cu ta defende muchanan hasta na momento cu nan propio mayornan no por tuma decisionnan apropia pa cualkier motibo.
DIARIO a start un investigacion total entorno di Richard Webb, cu buraconan den nos leynan y nos sistema educacional, a permiti pa habri un internaat pa mucha entre 10 y 22 aña, manera su registro na Camara di Comercio ta trece dilanti.
Con por ta posibel cu un Stichting ta wordo registra na Camara di Comercio cu e participacion cu e ta bay fungi como un internaat, cu ta un centro pa formacion di hobennan y instancianan concerni no ta laga investiga si e ta cumpli cu de demandanan pa haci esaki.
Cualkier persona na Aruba por yega habri un school, cu ta bay atende cu formacion di muchanan di 10 pa 22 aña di edad, sin cu departamentonan concerni ta investiga kico ta pasa?
Instancianan oficial ta drenta den accion ora nan haya indicacion cu bienestar di muchanan ta na peliger. Gilbert Webb ta bay Hues cu ta duna e instancianan aki rason!
Unda nos Ministronan di Enseñansa a keda den e situacionnan aki?
Kico ta formacion di un mucha? Na ki regla un school of internaat mester tene su mes?
Ora den nos sistema di formacion di mucha nos busca un negoshi manera e negoshi (sin beneficio manera e registro di Camara di Comercio ta bisa) di Webb ta bisa, nos solamente por papia di un internaat pasobra e muchanan ta keda completamente bou dominio di Webb sigur durante e prome dos lunanan.
Segun Webb, su negoshi ta cumpli cu exigencianan na Hulanda. Nos ta biba na Aruba, caminda nos tin Ministernan cu ta dirigi loke ta e base dinos futuro comunidad y cu sigur mester a laga investiga kico ta pasa.
Si ta un sistema educacional normal, pakico mester bisti na militar? Pakico e muchanan mester yama nan lider Comandante? Pakico Webb mester bisti na militar?
Nos conclusion? Michelle Hooyboer-Winklaar y Rudy Lampe a faya como Ministro di Enseñansa cu no por ta permiti pa Aruba Boot Camp ta ofrece cursonan hasta na nivel di HBO. Tur loke a resta ta pa nan yama nan mes Universidad!
Hooyboer tabata encarga cu Asistencia na Famia tambe y Rudy Lampe ta un Sociologo. Mas motibo pues pa e caso tristo aki, den cual mucha cu ta bou dominio di un grupo cu ta hunga militar, ta den wega, haya un desenlace.
Bienestar di mucha ta na discusion y nos sistema nacional educacional tambe!
Kico nos leynan ta bisa di un instituto educacional? Unda nomber y portret di e profesornan ta? Gilbert Webb tin papel pa dirigi un internaat?
Ki balor e estudio di profesional den nos sistema educacional tin ainda? Ki balor instancianan cu ta proteha nos muchanan tin y ki balor un veredicto di Hues cu ta papia un palabra cla?
Preguntanan cu nos ta haci nos mes na interes di mucha entre 10 y 22 aña, sin mencion si nan ta homber of muhe, cu por wordo condena na loke ta pio cu un internaat pero ta parce un tipo di prison combina cu universidad sin regla.
