ORANJESTAD (AAN) – E tema di cortamento di salario di empleadonan publico, tambe a bin dilanti den e conferencia di prensa cu Minister Presidente Evelyn Wever Croes, Dialuna di e siman aki.
Minister Presidente a splica cu manera ta conoci pa tur hende, aña pasa gobierno a invita tur sindicato pa sinta na mesa, y a pidi nan pa hunto cu gobierno bay corta e salarionan di empleadonan publico, pa asina gobierno tin un espacio pa yuda sector priva.
Na cierto momento Gobierno a yega na un acuerdo y a cuminza retene e suma di cortamento di salario, y poco luna despues Hulanda a bin cu exigencia cu esaki tin cu sigui, mientras cu gobierno kier a hacie te fin di aña pasa.
Fin di aña a yega, aña nobo a habri y eigenlijk e situacion di Aruba no a mehora. Aña pasa na April ni un hende tabata sa con largo e crisis ta bay dura, pero aworaki gobierno tin un miho bista, cu esaki ta tumando hopi tempo.
E cortamento di salario di 12.6% di e empleadonan publico riba instruccion di Hulanda e ta sigui como un ordo. E mandatario a indica cu e 12.6% aki ta consisti di varios componente. E empleado publico a entrega 5% tur luna di su salario. Banda di esey, mitad di su vakantie uitkering aña pasa y e aña aki tambe, y e ta entrega tambe 50% di un toelage cu e ta haya na Augustus y na November. E dignatario a señala cu e empleado publico no ta entrega nada di e toelage cu e ta haya na Januari, esey tur hende ta haye completo. Y tanten cu e palabracion aki ta vigente, e ta conta tambe pa esakinan.
Gobierno ta preparando pa paga e 50% di e vacancy uitkering, e tin e fondonan caba pa haci esey, pues tur ambtenaar lo haya mitad di esaki, y na Augustus y November e mitad di e toelage di esnan cu ta bin na remarca pe. E dignatario a subraya cu minister y parlamentarionan a entrega 25% cu ta sigui tanten cu ta un ordo.
