Minister di Salubridad a lanza campaña: ‘Lifestyle is Medicine’

ORANJESTAD (AAN): Minister di Salubridad Dangui Oduber ta bay ehecuta e asina yama Plan Nacional di Prevencion pa yuda mehora salud di habitantenan di nos isla y pesey Diahuebs a lanza e campaña Lifestyle is Medicine,

esta estilo di bida ta e mihor medicina y e campaña aki ta wordo financia completamente pa Pan American Health Organization.

“Ya caba hopi caminda na mundo ora bo bishita bo docter di cas door cu bo ta sufri di presion, e no ta prescribi un remedi den prome instancia”.

E ta consehabo pa bay haci ehercicio y si esey no yuda, e ora ey e ta prescribi un remedi pabo.

Bo estilo di bida ta determina naturalmente bo calidad di bida y esey ta e enfoke di e campaña, cu ta un colaboracion entre ministerio di Salud, Departamento di Salud Publico y Pan American Health Organization, unda cu e intencion di e campaña ta pa nos por duna informacion y educa nos comunidad riba habitonan mas saludable, segun Oduber.

El a sigui bisa cu e programa ta bay brinda e oportunidad pa gratis por medio di guia di diferente experto den diferente experticio, pa yuda tur esnan cu kier participa na e campaña aki.

E mandatario a sigui a indica cu motibo pakico a scoge estilo di bida ta pasobra e habitonan diario cu cada un persona na Aruba ta determina nan estado fisico, nan estado di salud y nan base pa un sistema inmunologico.

“Un habito no ta facil pa kita y pesey nos ta brinda e oportunidad gratis, pa e expertonan riba diferente tereno yuda maneha e habitonan di hende”, segun e mandatario.

El a indica cu habitonan positivo pa salud ta pa drumi suficiente, maneha stress, cushina na cas y haci mas ehercicio.

Habitonan cu ta bon pa coregi ta uso dimas di celular, tablet etc., humamento excesivo di cigaria, abuso di alcohol y tambe comemento emocional.