Reunion publico den Parlamento pa trata reglamento di orden di Ministerraad nobo
ORANJESTAD (AAN): Diahuebs 28 di October, a tuma luga den Parlamento di Aruba e reunion publico riba e tema di Reglamento di orden di Ministerraad nobo, cu mester a wordo adapta durante inicio di Covid.
Prome Minister Evelyn Wever-Croes den su contestanan, a enfatisa cu ora cu Covid a cuminsa aña pasa mester a bay den shelter in place y tur hende mester a cera curpa paden. Sinembargo, gobernacion no por a para pasobra tabata tin hopi decision pa tuma. Tabata tin decision den cuadro di crisis pero tambe otro decisionnan.
“Na e momento ey nos a dicidi di bay explora e posibilidad di bay traha virtual pa diferente motibo. Nos no tabata tin un sala na unda tur minister por a sinta hunto mantene e reglanan stipula pa combati Covid y tabata tin ministernan cu mester a bay den cuarentena. Como Gobierno, ta importante pa tur minister por tabata presente den un Conseho di Minister cu excepcion si e minister ta echt malo of e ta cu vakantie”, Prome Minister a duna di conoce.
Despues di a dicidi riba e cambio aki, Gobierno a pone esaki den man di IT pa garantisa y sigura cu e sistema aplica ta sigur caminda informacion no ta lek ni tampoco wordo gehacked y e privacidad tambe wordo sigura.
Unabes cu a haya e aprobacion, e plan pa bay digital cu Ministerraad a sigui. Prome Minister a remarca, “Mi no sa mucho di IT pero mi a laga nan evalu’e y mi a laga nan repasa pa ta sigur y garantisa cu informacion di Conseho di Minister no sali riba caya”.
Prome Minister a duna di conoce cu no ta tur reunion a bay na forma virtual pero solamente si tabata necesario. E mandatario ta di opinion cu reunionnan di Conseho di Minister mester ta den persona pa ta mas efectivo ora di tuma decision, delibera, propone y fiha maneho.
Reunionnan virtual a traha ora tabata realmente necesario. Cierto momento Gobierno a cuminsa traha tambe cu cierto schedule pa fiha cua grupo ta na trabou na principio di e crisis. “Asina mes, diferente biaha toch ministernan mester a reuni hunto cu excepcion di esun cu ta den cuarentena. El a funciona. Mi ta contento cu nos a haci e cambio e tempo ey pasobra el a permiti nos continua cu trabaonan”, Prome Minister a enfatisa.
Na final di e contesta riba e tema aki, Prome Minister a bisa: “Nos ta den un era di digitalisacion y innovacion y den e cuadro aki un cambio asina ta hopi importante pa digitalisa procesonan y pa tene reunionnan virtual”.
