ORANJESTAD (AAN) – Minister di Salud, Dangui Oduber, den su relato tocante su maneho y vision den salud pa 2021-2015,
a reitera cu prevencion den salud ta hopi importante den cuadro di tin un comunidad mas saludable, unda por baha e indice di mortalidad.
“Nos ta bay inverti den concientiza, informa, educa nos comunidad riba e importancia di biba saludable, come saludable, participa activamente na movecion, pa asina por baha e gastonan den cuido, den e cuadro di Prevencion Nacional di Salud, cu ya caba nos ta ehecutando, pasobra nos a traha e plan aki for di Gabinete Wever-Croes 1, conhuntamente cu tur stakeholders den salud na Aruba, y Panamerican Health Organization.
E dignatario a subraya cu debi na e pandemia di Covid-19, no por a sigui ehecuta e plan aki, pero awo cu e situacion ta un tiki miho, nan ta sigui implementa e Plan Nacional di Prevencion.
Un di e aspectonan mas importante den esaki ta e ley cu a wordo aproba algun siman atras, ta e ley “Beperking Tabac Producten” cu ta prohibi humamento den areanan publico y bendemento di cigaria los den supermercadonan, y cu ta un ley hopi importante den cuadro di prevencion, y cu a wordo aproba unanimamente pa e miembronan di Parlamento, pa cuminza implemente den aña 2022. Algo hopi importante tambe, den cuadro di prevencion, e dignatario a subraya, ta e Clinica Obesitas, cu conhuntamente cu Hospital y AZV, gobierno ta haciendo e tramite caba, pa bin un clinica dirigi na personanan obeso cu mester di ayudo psicologico, un dietista y un ‘personal training’ pa guia nan con pa hiba un bida mas saludable, cu finalmente ta nifica “yuda nan mes”, ya cu un persona saludable tin mas productividad. e ta integral del e plan di prevencion di salud, Minister Oduber a reitera.
El a agrega cu e ta reorganizando diferente departamento den Salubridad Publico, tambe den Inspeccion y sin lubida e innovacionnan den cuido cu gobierno kier haci, pa medio di e tecnologianan cu ta wordo brinda. El a referi na e sistema cu sin bay docter di cas, via internet e pashent por haya un cita pa e docter wak’e, si e ta haya necesario pa wak e pashent fisicamente. Pues esaki tecnologia nobo cu ta bay haci uso di nan, y tin diferente ley anticua cu e mandatario tin gana di wak si por actualiza y moderniza cu tambe ta parti di e vision cu gobierno kier hiba pa e proximo añanan.
