Participacion empleadonan publico na accion sindical a defrauda --- *DIARIO a pronostica loke awe ta realidad den un mundo sin rumbo --- *Gobierno mester evita tur gasto y Pueblo mester di trankilidad y paz
ORANJESTAD (AAN) — No tin un peliger economico, financiero y social mas grandi cu e menasa di inseguridad.
Kico inseguridad ta nifica, Aruba por a experencia ora e proyecto Citgo cu a yena cielo di Aruba cu streanan di promesa, a hinca Aruba den un incertidumbre total cu a haci cu ningun instancia local of internacional na 2017 por a presenta un pronostico pa Aruba.
Rapportnan oficial cu a mira luz na 2017 no por a duna Aruba un indicacion con e futuro di e pais lo tabata, loke tabata encera cu e ciudadano tampoco por a planea kico e mester a haci.
Kico a pasa cu Arubianonan cu nunca a mira apertura di Citgo despues cu a baila y traha plannan di fantasia? Kico a pasa cu Arubianonan cu te awe mester paga debe cu nunca nan lo a haci si nan tabata conciente di e realidad di futuro di Aruba na 2017?
Pa basta tempo DIARIO ta adverti Aruba pa keda alerta y pa no uza fantasia ora ta atende cu futuro.
DIARIO a vigila cada paso cu Gobierno Wever-Croes a tuma y a sostene e necesidad pa hiba un maneho di austeridad pa e pais por a sigui cana den un situacion, cu a stop di existi durante fin di siman ora mundo a cera conoci cu culminacion di su peor crisis den su tempo moderno.
Siman pasa DIARIO a bati alarma ora sindicatonan a lanta para y a bini cu accionnan na un momento cu nos tabata prepara pa por a atende cu e crash mundial.
Sindicatonan cu a marcha bay Parlamento y a exigi un contesta directo di Presidente di Parlamento, cu no por tuma ningun decision riba su mes. Sindicatonan, cu despues a bay exigi un contesta di Gobierno mientras ya alarma mundial a wordo bati pa loke ta pasa awe mundialmente.
Awe nos ta bolbe entrega contenido di tur analisis na Pueblo di Aruba, cu manera nos a bisa for di siman pasa mester di un temporada di trankilidad y paz.
Cu tin politico na Aruba cu ta kere cu nan a nace pa ta den Gobierno, nos por comprende. Tin hende ta nace pa nace pa sirbi nan pais y otro hende ta nace pa wordo sirbi dor di nan pais cu mester duna nan loke nan mes no por alcansa.
Cu tin sindicalista, cu mester educa nos muchanan pero cu no ta dirigi e pueblo a base di realidad y responsabilidad, nos tur sa.
Awe e desaroyonan mundial a pone tur carta riba mesa pa Pueblo di Aruba. Manera a base di berdad nos a adverti, e mundo financiero y economico cu nos tabata tin como garantia te na momento cu Covid-19 a ataca, a crash.
Inseguridad ta bati na porta di tur inversionista, organisacionnan grandi, gobierno rond mundo.
Awe un etapa mundial nobo ta presenta su mes. Un etapa cu no tin espacio pa awor oposicion den Parlamento bay hunga wega politico pa causa un crisis den Gobierno cu por a spera for di momento cu Mike Eman a cuminsa bisa cu Gobierno mester cambia algun dia pasa.
Na mes momento tur gobernante mester evita di hinca Aruba den gasto cu no ta necesario.
Sindicalistanan no mester mira nan miembronan como nan entrada financiero pa medio di contribucion, pero mester yuda crea un futuro cu Aruba por carga.
Comercio mester duna di su parti cu bon formacion di su miembronan cu mester carga e base economico di e pais den un crisis mundial.
Loke nos a adverti cu por pasa, a pasa. Awe e medidanan cu Gobierno Wever-Croes ta tuma, a haya balor y ta duna forsa pa cana den un mundo di inseguridad cu ta exigi preparacion pa un “worse case scenario”, cu no ta den man di Aruba ni Reino mas!
