DIARIO ta sigui urgi pa Parlamento atende cu personal di Gobierno --- *Un solo cartera Pueblo tin pa paga su trahador directo y indirecto --- *Autonomia di companianan di Gobierno mester wordo mara na limite
ORANJESTAD (AAN) — Na 2021, na varios ocasion, DIARIO a presenta su punto di bista riba e situacion hopi bez inaceptabel di e companianan di Gobierno.
E hecho cu e companianan aki ta entidad empresarial riba nan mes a base di ley, ta haci cu por considera nan empresa priva mientras ta placa di Pueblo ta paga pa nan.
Na 2021 sigur mester cuestiona e forma cu trahadornan di Setar a haya un bonus na fin di 2021 y sigur na momento cu Aruba ta den un insiguridad grandi.
Ta hustamente na final di 2021 e forma cu a atende cu un bonus pa e trahadornan, ta pone Aruba para keto.
Atrobe nos ta bolbe na origen di Compania di Gobierno tanto tempo pasa ora tabata busca un forma pa companianan vital di comunidad no wordo mara un relacion directo cu mundo politico, cu asina por a haci y deshaci den e departamentonan y servicionan cu ta di interes basico pa comunidad y funcionamento di comunidad.
E companianan di estado, tabata un compromiso entre socialismo (comunismo) y e sistema di empresa priva.
Politiconan a perde control directo riba e companianan di Gobierno pero placa di Pueblo directamente y indirectamente mester tene e companianan aki na bida.
Legalmente un gobernante por bisa cu e no por dicidi den un compania di Gobierno. E gobernante ta lubida cu den empresa priva tambe e personanan cu a hinca placa den un empresa no por bisa e Comisarionan of e Directiva sin mas kico nan mester haci sin cu un que otro tin un concenso.
Aki nos ta papia di companianan grandi cu capital di mas cu un persona, cu pa esaki tin nan comisarionan cu ta evita pa un of otro persona cu tin placa den e negoshi wordo perhudica.
Ora a crea e companianan di Gobierno, a dicidi di introduci Comisarionan cu ta vigila entre otro e gerentenan di e companianan na nomber di Pueblo.
Esaki ta haci cu gobernantenan tin un deber pa dicidi kico ta pasa den un empresa di Gobierno cu un bista cu no ta politico.
Pero e Gobernante no por laba su man den loke mester pasa pasobra e compania mester funciona na interes di e comunidad.
Recientemente nos a atende cu loke ta pasa cu Serlimar y e problema serio cu ta afecta trahadornan.
Prome nos a cuestiona loke tabata pasa na WEB y nos a mustra bon cla, cu Prome Ministro Wever-Croes tin derecho di vigila y actua pa baha prijs di e produccion di awa y coriente y sigura e infrastructura cu Aruba mester.
Nos a mustra riba e bienestar di Aruba, cu ta e propietario di WEB cu mester proteha e compania di awa y electricidad pa Aruba.
Awe nos no por bay sin mas di acuerdo cu e decision di Ministro Wever cu por duna un bonus na trahadornan di Setar.
Na e momentonan aki Aruba ta na careda pa mira con ta haci cu Serlimar cu a wordo permiti pa wordo dirigi na un forma, den cual no a tene cuenta cu ta propiedad di Pueblo e compania ta.
E hecho cu trahadornan a traha bon of malo no ta motibo pa duna un bonus sin mas. Na mayoria di empresa na Aruba, trahadornan ta traha bon pero no por haya un bonus.
Si na 2021 duna bonus den un tempo di problema mundial serio, kico ta pasa si na 2022 problema bati na porta manera por spera?
Cuanto placa Setar mester inverti den un futuro den cual telecomunicacion ta central?
Ta na su lugar pa revisa e decision cu a wordo tuma pa duna trahadornan di Setar un bonus na Aruba, na un momento cu henter mundo ta den crisis.
Parlamento mientrastanto mester atende e relacionnan directo y indirecto den trabou di Gobierno, cu a evoluciona a base di historia di e pais pero awe ta sclama pa mas atencion pa coregi loke den tempo a demostra di no ta funciona manera LMA pa trahadornan di Gobierno y e realidadnan di Companianan di Gobierno.
