Minister Cicilia a atende Travel EXPO na EPI organisa pa e studiantenan como clausura di nan curiculo

ORANJESTAD (AAN):  Diaranson merdia, den cuadro di e compromiso firme di Gobierno di Aruba pa fortifica nos pilar economico principal,

Minister di Turismo, Transporte y Labor, mr. Wendrick Cicilia, a haci un bishita oficial na e sector di hospitalidad di Colegio EPI. Durante e bishita, Minister Cicilia a atende un Travel EXPO na EPI organisa pa e studiantenan como clausura di nan curiculo.

            Minister Cicilia a expresa su gran aprecio y admiracion pa e nivel di preparacion y pasion cu e hobennan a demostra. Locual e studiantenan a presenta den e Expo ta un demostracion di nan compromiso, creatividad y pasion pa un sector cu ta fundamental pa nos desaroyo economico.

            E grupo di hoben cu a participa den e Travel EXPO ta duna e confiansa cu nan ta cla pa carga nos pilar economico principal y hiba nos turismo na e siguiente nivel. E talento, disciplina y energia di e hobennan aki, ta testimonio cu Aruba su futuro ta den bon man.

            Ministerio di Turismo lo sigui traha man den man cu Ministerio di Enseñansa y EPI pa amplia e oportunidadnan pa formacion y capacitacion di nos hobennan, pa asina garantisa un transicion efectivo entre educacion y e mercado laboral.