ORANJESTAD (AAN): Embehecimento di nos poblacion ta posee un problema structural pa pais Aruba, socialmente, den cuido y tambe financieramente.
Pa minister di asuntonan di Adulto Mayor, Sr. Ursell Arends, a haci esaki pa bira un di e prioridad nan di e Gabinete actual door di institui e Ministerio di Asuntonan di Adulto Mayor.
Den ausencia di minister Arends, conseheronan di e ministerio a duna un presentacion amplio tocante e ultimo desaroyonan den e maneho di asuntonan di adulto mayor na un grupo grandi di representantenan di gruponan social di personanan 60+ durante e workshop organisa door di Fundacion Movimento Ta Bida.
Un di e prome pasonan di minister Arends tabata pa declara luna di october como luna di Adulto Mayor y institui e Directie Ouderenzaken unda lo centralisa tur e esfuersonan cu tin pa mehora e variedad di retonan cu e grupo 60+ den comunidad ta enfrenta. Entre otro trabaonan a ser a inicia pa instala un helpdesk unda personanan por acudi na dje via telefon ora tin mester di cualkier sosten of asistencia. Den e lunanan binidero lo enfoca mas riba promove e servicio nobo aki pa comunidad di Aruba.
Meta di Directie Ouderenzaken ta pa subi e accesiblilidad na servicionan di cuido, stimula partipacion y bienestar di nos adultonan mayor. Tambe lo duna conseho na minister riba e resultadonan di ehecucion di maneho como tambe yuda cu e desaroyo di conceptonan di landsbesluit na beneficio di nos adultonan mayor.
Minister Arends su vision diferente di e adulto mayor den comunidad ta dirigi riba optimalisa participacion den comunidad den un sentido amplio. Entre otro lo enfoca riba stimula programanan social y fisico den nos Centro di Barionan, crea servicionan adapta na e necisidadnan di e grupo 60+. Tambe kier promove mas cooperacion entre casnan di cuido como tambe otro instancianan pa por subi eficiencia operacional y purba na reduci e gastonan di esaki of provee mas balor na e clientenan.
Ta importante pa balora y cuida nos adultonan mayor. Na final di dia nan ta nos tesoro y ta nos deber moral pa garantisa nan e calidad di bida y cuido cu nan tur merece.
