No ta prome bez cu AVP ta den problema cu Husticia y tin Rapport di Refineria tambe - *Con mester vota pa Benny si empresa priva no ta tuma Benny den servicio? - *No ta Ministerio Publico pero AVP a dicidi pa detenido como candidato
ORANJESTAD(AAN)—Atrobe Mike Eman ta duna prueba, cu si e haya oportunidad ta dictadura tin riba Aruba.
Cu Mike no tin ningun clase di respet pa Parlamento di Aruba a keda demostra na varios ocasion.
Pa Mike por a cera un acuerdo cu Nicolas Maduro y asina cambia Aruba den un centro di persona persigui pa husticia internacional, Mike a bay contra Ley cu a exigi pa e acuerdo cu Citgo, cay den man di oposicion pues partidonan cu no tabata AVP.
Cu Mike, Ley no tin ningun balor, continuamente ta bini dilanti den rapportnan cu ta papia di e forma con Mike Eman y AVP a destrui Aruba.
E motibo cu Mike no tabata defensa pa Benny Sevinger den Parlamento, no ta comoci. Awor cu e ta sinti rosea cayente di e Arubiano cu el a traiciona, Mike ta bin splica cu e ta drenta Parlamento despues di eleccion.
Mientrastanto e balor di Parlamento a wordo kibra na momento cu Mike a insisti cu Benny Sevinger lo ta riba lista di AVP.
Na e momento, Mike tabata bon conoci cu e hecho cu cualkier momento por a detene Benny Sevinger, mescos cu a haci cu tur sospechoso den e caso aki.
Pero aparentemente e sospechosonan cu a sinta tur tempo den detencion preventivo den e caso Avestruz, ta ciudadano di menos grado cu Benny Sevinger, e amigo back to back di Mike Eman.
Amigonan nan ta sigur pasobra ta hunto nan tabata gasta placa di Aruba den e proyectonan di Bo Aruba, cu lo ta peso riba concenshi di cualkier hende cu ta pensa cu e midi di moral di e Arubiano.
Cu Mike Eman ta trata di scapa su cara, ta comprendibel. Cu Mike y su partido ta uza e armanan di mas sushi pa evita cu hende ta mira nan sushi, tambe ta comprendibel. Pero e no por tapa solo cu un dede.
No ta prome bez cu AVP ta den problema cu husticia, cu a pone cuatro miembro di AVP core te ora nan mester a presenta dilanti Huez den e caso Fondo Desaroyo Nobo San Nicolas.
Den e caso aki ta Henny Eman so por a sali liber pasobra no tabata tin cuenta anual. Tres ministro otro a wordo acusa.
Con e caso a caba? Na un beach, caminda un miembro di Ministerio Publico lo a topa cu abogado di AVP y a wordo dicidi cu Ministerio Publico no ta bay contra e sentencia di Huez cu a duna Henny Eman vrijspraak, si e tres otro Ministronan cu a wordo condena, tambe hala nan apelacion dilanti Corte Superior atras.
Pues aki ta trata di un deal cu tabata tin riba beach entre e representante di e Ministronan di AVP y Ministerio Publico y awor Mike Eman kier yora pasobra Ministerio Publico ta den nan contra.
Ta tempo cu Mike Eman tabata Prome Ministro, Husticia a atende cu Paul Croes cu a wordo condena tambe pero a apela su caso.
Awe Benny Sevinger a sospechoso. Pero pasobra ta AVP, pasobra ta Benny Sevinger, pasobra ta Mike Eman, tur hende mester cera nan boca.
Esaki ta democracia segun Mike Eman, cu porfin mester bay busca trabou pa e traha pa asina comprende cu den empresa priva sigur nan no ta tuma Benny na trabou como sospechoso ni detenido.
Pakico e mester ta riba lista pa solkicita pa Parlamento? Pa Mike mustra ki poder Mike tin?
Mike bin splica Pueblo kico el a haci cu placa di Pueblo cu atrobe a wordo traiciona dor di Mike. Mike bin splica pakico e no por a drenta Parlamento. Mike bin kita e antifaz cu e tin bisti pa hende mira kende ta Mike cu solamente conoce un interes den su bida y e interes yama Mike!
Den Parlamento di Aruba, dignidad ta hancra. Awe Mike ta bolbe trapa riba dignidad, cu cual aparentemente e tin un problema.
