ORANJESTAD (AAN) – Minister Presidente Evelyn Wever Croes, a elabora den conferencia di prensa Diahuebs, riba e temanan: Financiamento di Hulanda,
situacion cu SKOA y Dia di Eleccion awe, 25 di Juni. Pero na prome lugar, e mandatario a tuma un espacio chikito, pa referi na e Fiesta di Dera Gai, cu a wordo celebra Diahuebs ultimo, 24 di Juni.
“Awe ta Dia di San Juan, un dia cu nos como Arubiano, ta gusta celebra. Ban celebra nos cultura; nos cultura ta nos identidad. Pa mantene nos cultura na bida pa e futuro generacionnan tambe por sigui goza di dje”.
Seguidamente, e dignatario a elabora tocante e financiamento cu Hulanda.
“Mi por bisa cu hopi alivio y alegria, cu nos a logra pa asegura e di tres tranche di sosten di likidez, pa e di tres cuartal di e aña aki, cu ta e lunanan di Juli, Augustus y September, cu ta un suma di 181 miyon florin. E suma aki a wordo aproba door di Conseho di Minister di Reino, y Secretario di Estado Raymond Knops a manda informa Parlamento, di esaki. Den su informe, Secretario di Estado Knops a informa cu Aruba a cumpli cu tur e condicionnan necesario, pa por yega na remarke pa e sosten di likidez aki”, Prome Minister a duna di conoce.
E mandatario a agrega cu Knops, den su carta pa Tweede Kamer na Parlamento di Hulanda, a elogia e forma con gobierno di Aruba a atende cu e tema aki, con Aruba ta duna su palabra y ta cumpli cune, y asina ta trece trankilidad y stabilidad y cu aworaki Aruba por conta cu e 181 miyon florin aki, tambe.
“E suma ta indica cu ainda nos ta depende grandemente di Hulanda. Claro cu e suma aki lo ta bahando, pasobra nos ta mira cu Aruba ta den recuperacion. Nos ta mira cu ya caba tin hopi mas movecion economico riba nos pais, pero ainda nos ta depende di Hulanda”.
Mientras tanto, Minister Presidente Evelyn Wever-Croes, a declara, gobierno a cuminza di biaha cu e trabaonan pa e tranche di e siguiente cuartal.
El a duna di conoce cu durante e siguiente simannan lo fiha cual ta e condicionnan pa e ultimo cuartal, y esaki ta temanan cu tin atencion di gobierno.
Prome Minister a comenta cu awo gobierno ta sigui na mesa cu Hulanda, tocante e rijkswet y keto bay nan ta deliberando riba e conseho di Raad van Staten y mira kico ta resta di e leynan di COHO (Caribish Orgaan voor Herforming en Ontwikkeling) y di RAft (Rijkswet Aruba Financieel Toezicht), despues cu RvS a duna Aruba razon den esaki.
E mesun puntonan cu a bin dilanti aña pasa, den e negociacion cu Hulanda, Raad van Staten a subraya den su conseho, e dignatario a declara.
