Mexico kier sigui ehemplo di Aruba pa cuminza desalinacion pa soluciona crisis di awa

Debi na crisis di awa na Monterrey

ORANJESTAD (AAN): Ata un otro informe cu ta mustrabo, cu keto bay e sistema di produci awa di bebe for di lama, ta pone Aruba keda den spotlight mundial.  Fuera di esey e hecho cu e compania WEB Aruba NV a bin ta un trend-setter den e sistema aki, y ta un ehemplo pa hopi otro pais.

   Pesey mes, e aña aki un di e temanan mas importante y actual den agenda di Gobierno na Mexico, ta acceso na ‘awa’.  Tanto Gobierno federal como esnan local, ta buscando forma con pa garantiza cu e liquido aki lo por yega na tur e poblacion Mexicano.

   Esaki a bin debi na e alerta for di ciudad di Monterrey, cu nan companianan grandi, industria, y economia creciente, pero ta sufriendo pa cu e scarcedad di awa potable pa tur hende di e ciudad y di zonanan rond di dje, y principalmente e parti metropolitano di e ciudad ey.

   E problema di scarcedad di awa?  Gobierno Mexicano ta bisa cu e ta resultado di e cambio climatico.  Algo similar por mira na parti zuidwest di Merca, incluyendo estado di Arizona y California caminda secura tin nivel di awanan den dam na un alerta grandi.  Hasta e famoso Hoover Dam ta hopi abao pa prome biaha den historia.

   Aunke Gobierno Mexicano lo por tin razon, toch e sistema di maneha politica, cu corupcion y falta di interes durante tur e añanan aki, y sin preocupa cu e seis aña di advertencia cu nan ta ricibiendo, a pone cu pesey awor henter un ciudad a keda sin awa.

   Ta hopi obvio cu e cambio climatico a haci e zonanan cu ta estilo desierto, a bira mas seco.  Zonanan tropical awor ta hayando mas awacero.  E parti zuidoost di Mexico tin un problema pa exceso di awa, y e parti nort di Mexico ta sufriendo pa scarcedad di esey.  Pero porfin Gobierno na Mexico City ta cuminza tuma nota cu tecnologia tey pa yuda evita cu e problema aki ta socede, y e solucion tey tambe!  E yama ‘desalinacion’.

   E tecnologia aki ta existi pa hopi aña caba, y paisnan cu no tin acceso na awa dushi, manera e isla di Aruba, tin 100 porciento awa di bebe ta bin for di lama desde aña 1932, pues ya casi 100 aña.

   Conseheronan ta informa Gobierno di Mexico, cu e proceso di desalinacion y haci awa di lama bira uno potable, ta un solucion viable pa un pais manera Mexico.  Nan tin un costa hopi grandi, tanto na Oceano Pacifico como tambe Golfo di Mexico y Caribe.  Pero e costo y mantenimento di e equiponan lo bay rekeri un inversion hopi grandi.

   Na Arabia Saudita ta existi e planta desalinador mas grandi di mundo cu un capacidad di mas di 1 miyon meter cubico di awa pa dia.  Esey ta casi igual cu loke Mexico ta ricibi anualmente na yobida, esta di 1.5 miyon meter cubico.  Un planta di e tamaño ey por substitui caso henter e awa cu ta yobe un aña na Mexico.  Un solucion di e tipo ey por alivia e tan maltrata cunucunan na Mexico, y awor laga e awa existente pa produccion di agricultura, y tambe pa e comunidadnan leu unda no ta existi tuberia pa awa potable.

   E problema principal lo bay ta e costo, por ehemplo, cuanto lo costa pa transporta awa rumbo pa ciudad di Monterrey for di e costa mas cercano na Tamaulipas.  E beach na Carbonera ta esun mas cercano, y ta como 300 kilometer linear di distancia, y tin di pomp esaki na un poco mas di 500 meter riba nivel di lama.  Na e costo grandi di transporte ey, lo tin di agrega e costo di desalinacion, cu segun expertonan, ta yega na como 70% di e costo di energia pa logra esey.

  Un solucion cu Comision Nacional del Agua (Conagua) na Mexico ta propone, ta pa cada municipio paga pa e servicio aki sin subsidio di Gobierno, aunke nan ta mira esey dificil.  Como cu no tin hopi placa ta drenta den caha di e Gobiernonan ey, y no tin bon control pa cu e uso di recursonan.

   Pero hecho ta cu awa mester ta poni na punto mas halto riba agenda strategico di Mexico como parti integral di e plannan di crecimento.  E tecnologia ya ta existi, y djis tin di siña mas di e expertonan di sea Aruba of Arabia Saudita, y aplica nan.

   Mientras tanto manera por mira riba e potretnan aki, tur dia na Monterrey ta hopi hende para den rij largo sperando di por yena cualkier hemchi of baki cu awa for di trucknan cu ta yega eynan cu awa potable.