Ronella Croes: Pa luna di Juni ta spera un total di 74.500 bishitante - ORANJESTAD (AAN): Ronella Croes, CEO di Oficina di Turismo a duna un actualisacion basa den e ultimo cifranan pa loke ta turismo.
El a indica cu e resultado pa luna di Mei ta mustra cu Aruba a ricibi un total di 70,683 bishitante locual ta 20 porciento mas cu April.
Por mira tambe cu for di Maart te cu Mei Aruba a conoce un crecimento consistente a base mensual y por papia di un crecimento di 'double digit growth', a señala.
Si ta mira Mei 2021 y compara esaki cu Mei 2019 cu tabata e ultimo aña normal pa turismo por mira cu a recupera 80% di locual Aruba a ricibi na Mei 2019.
Pa e mercado di Merca por papia di casi un 100 porciento di recuperacion ora di mira e cantidad di mericanonan cu a bishita Aruba den luna di Mei 2021 compara cu Mei 2019, Croes a agrega.
Tambe tin un bista riba luna di Juni y pa Juni ta spera un total di 74.500 bishitante y esaki ta un continuacion di crecimento. Esaki ta significa pa Aruba cu unabes cu finalisa Juni, por cuminsa papia concretamente di kico a logra den e prome mitad di e aña aki.
Si cera cu e resultado aki pa Juni, esey kiermen cu ta mira un di dos kwartaal pa aña 2021 unda cu a conoce un crecimento di 82% compara cu e prome kwartaal.
Esaki ta indica tambe cu si compara e di dos kwartaal di e aña aki compara cu e ultimo kwartaal II normal, pues na 2019, cu lo a recupera 72% di locual a mira cu e cantidad di bishitante na kwartaal II di 2019, Ronella Croes a remarca.
Pa luna di juni mester tene cuenta cu diferente factor manera e hecho cu mercado hulandes a asigna e codigo geel pa Aruba y esey ta stimula viahenan pa Aruba fuera di e mercado mericano, entre otro, a agrega.
Tur e puntonan anterior ta duna un indicacion cu pa e prome mitad di aña a mira un grado di recuperacion di 55%. Esaki ta un tiki mas cu mitad di locual a ricibi durante di e prome mitad di 2019.
Ya caba e proyeccionnan ta wordo ahusta pa loke ta e di dos mitad di 2021 conforme tur e tendencianan cu a bin ta cambia hopi. Pero ta mirando un continuacion den e grado di recuperacion, e CEO di ATA a declara.
