ORANJESTAD (AAN): E barco di Celebrity Millennium tin capacidad pa carga 2.138 pasahero y ta uno cu ta ofrece servicio di luho, cushina di clase mundial, y hasta e pasaheronan cu ta keda den suites, ta ricibi un mayordomo personal.
E barco a caba di bira e prome den Norte America y Caribe cu a cuminza cu viahe crusero riba Diasabra 5 di Juni 2021, ora cu el a sali cu 548 pasahero for di St. Maarten, pa bay bishita Barbados, Aruba, y Curacao.
E motibo cu tin 548 pasahero so, ta pa cumpli cu e protocolnan nobo estableci pa viahamento mas safe durante e pandemia. Aunke tur pasahero adulto ta vacuna, y tambe tur miembro di tripulacion a ricibi nan vacuna, toch ta purba di mantene distancia fisico. Solamente e muchanan bao di 18 aña no ta vacuna, y mester a haci un PCR Covid test prome cu a subi barco. Lo keda observa nan tambe durante e viahe.
Esey nifica cu awe Diaranson mainta pa 7:00 am ora cu e barco aki drenta Waf di Aruba, por bisa cu 95% di e pasaheronan abordo ta vacuna contra Covid-19. Despues di a haya e revision di Inmigracion y di oficialnan di salud di DVG, pa 8:00 am e porta di barco lo habri pa e pasaheronan por sali y subi caya.
E cantidad di shore-excursions cu a wordo ofreci tambe ta limita, pa asina cumpli cu protocol y reglanan sanitario.
E barco lo keda te 6:00 pm, y e ora si e barco lo sali rumbo pa Curacao.
NORWEGIAN JOY:
Mientras tanto e barco grandi cu ultimo simannan tabata mara net pazuid di e Toren di Aruba Ports Authority, a bandona Waf di Aruba y a sali rumbo pa San Juan, Puerto Rico unda e lo yega Diahuebs mainta.
Recien DIARIO a raporta con monton di miembro di tripulacion procedente di Filipinas a yega Aruba pa asina subi Norwegian Joy, como cu nan a haya ordo pa cuminza prepara pa subi lama.
Di e forma aki, a crea espacio pa asina por mara Celebrity Millennium na Waf di Aruba.
E otro dos barconan di Norwegian Cruise Lines, esta Norwegian Gem y tambe Norwegian Sky si keto bay ta mara aki, como tambe e barco Insignia di Oceania Cruises.
Riba e potret por mira Norwegian Joy mara den Waf di Playa.
