DMH cu proyecto piloto “Intervencion trempan pa mucha cu necesidad special den centronan di cuido

ORANJESTAD (AAN) – Departamento di Mucha y Hoben (DMH), a inicia dialuna 7 di Juni, e proyecto piloto di intervencion trempan pa nos muchanan cu necesidad special, den centro di cuido di mucha.

Esaki ta e cuminzamento di e prome etapa unda e dos profesionalnan di Universidad di Missouri, Kansas City Institute for Human Development, Dr. Kelly Hantak y Dr. Michael Abel lo ta presente na Aruba pa yuda crea y implementa un sistema efectivo, hunto cu e instancianan cu ta wordo considera importante den e proyecto aki.

Minister Glenbert Croes, titular di Asunto Social, den un entrevista a splica cu e ta gradici e lidernan di e proyecto aki, entre nan SueAnn Ras y Anouk Eman, pa nan iniciativa di impulsa un discusion nacional entre tur e stakeholders profesional di diferente sector, pa un plan di intervencion trempan, na e centronan di cuido.

E idea ta pa e wordo desaroya na nivel nacional y no solamente den centronan di cuido, segun  Glenbert Croes. “Pero mester trece e profesionalnan hunto pa defini kico ta bay ta e plan di accion nacional na tur sector y pa ki edad. Esaki ta rekeri un discusion un poco mas profundo, entre e profesionalnan, y esey a cuminza desde dialuna y lo sigui durante e siman”, e dignatario a duna di conoce.

E mandatario a gradici cu el a participa den e reunion, no obstante cu e no ta un profesional riba e tema. El a expresa cu señal di e ultimo cuater añanan aki ta haci cu e kier contribui tambe, humildemente, for di e perspectiva di gobernante y politiconan, di tin e compromiso pa bin cu un proyecto di intervencion trempan pa nos muchanan cu necesidad special, den centronan di cuido di mucha. Pesey mes e ta contento di a participa.

“Na Aruba nos a bin cu e social crisis plan y nos a bin cu e vehiculo presupuestario pa tin fondonan pa e compromiso nacional aki y un plan nacional di accion pa atende tur e problemanan social cu ta afecta e formacion di nos muchanan cu tin cualkier dificultad, of reto special, cu nos mester duna nan extra support, pa nan por desaroya nan bida den full calidad y den nan potencial completo”, e mandatario a señala.