Basta ciudadano 60 plus a bay vacuna Diasabra na Ritz Carlton

ORANJESTAD (AAN)—Diasabra for di hopi tempran, kiermen ya prome cu 8’or caba, tabata tin un rij grandi di personanan 60 plus, wardando pa 9 ‘or bati pa e vacunacion di prome, di dos y di tres dosis, contra covid-19 cuminza.

E personal tabata for di trempan caba eynan, pa atende cu e personanan wak si nan a bin cu nan  carchi AZV, of passport, y number di code. Diferente persona no tabata corda nan code, y no a pensa riba esey y no por a habri e app di DVG pasobra no tabata tin data. Pero nan a wordo yuda cu hopi cariño y amabilidad.

Locual si tabata fastioso ta cu bao di tent ni un a scapa for di e awacero, e biento a encarga su mes di manda yobida pa esnan para den rij, y aki e personal tambe a haci esfuerzo pa ubica e personanan lagando nan bin mas cerca di otro y por cana dilanti mas cerca di e lugar di registracion.

For di mainta por a mira hopi hende grandi bin, algun riba rolstoel acompaña pa un familiar no obstante e yobida. E sala na unda a vacuna esnan cu a bin pa e di tres shot tabata full yen, pero a conta cu suficiente persona pa prik, y e parti ey si tabata bay basta lihe, pues solamente a warda e 15 minuut di rigor pa wak si tin reaccion of no. Hopi hende tabata contento y gradici cu DVG y Ritz Carlton, pasobra a logra vacuna sin nodi bay cu verwijsbrief di specialista. Esaki sigur, a yuda cu tanto hende asina a dicidi pa bin di biaha, na luga di warda riba cita na DVG.

E potret ta mustra apenas un parti di e prome rij, poco a tarda pa cantidad di mas hende yega, cu mester a habri espacio pa nan bao di tent pa nan no sigui  muha.