Aña 2023 parce tampoco no tin solucion prepara pa Adictonan Ambulante

ORANJESTAD (AAN): Un peticion a drenta di instancianan y profesionalnan trahando cu nan, pa pidi prensa pa stop di yama nan ‘Choller’ y mihor usa e nomber di ‘Adicto Ambulante’.  OK, prensa a cumpli.

   Pero ki tempo tur instancia lo yuda cumpli cu resto di pueblo, pa elimina e fenomeno aki di riba caya?  Aruba no mester inventa e wiel, pasobra varios otro isla den region, y hasta ciudad grandi manera Medellín (Colombia) a logra elimina e fenomeno aki di Adictonan Ambulante riba caya.

  Na Aruba?  Pa 2023 ta parce cu tampoco no tin solucion prepara pa reduci e molester di Adictonan Ambulante, principalmente den ciudad.  Anochi y marduga nan ta slenter tur caminda busca maldad pa haci.  Y den dia bo ta haya nan drumi ta ronca unda cu ta na Oranjestad.

   Diabierna siman pasa ora cu prensa ta wardando sentencia di un caso grandi dilanti Corte di Husticia, a bin nota cu tabatin un Adicto Ambulante femenino djis drumi banda di Corte e ora ey di merdia pa atardi.

  Oranjestad en general ta pasando keto bay den proceso di embeyecimento, pero e problema mes di Adictonan Ambulante tey ainda.