Omicron a herida economia y e prome parti di 2022 lo ta hopi dificil --- *Caracter explosivo di Omicron a sorprende industria mundial turismo --- *Advertencia serio di IMF riba resultadonan di e atake IMF pa economia
ORANJESTAD (AAN) — “Temponan serio ta dilanti porta di paisnan den desaroyo.”
Esaki ta e advertencia cu a wordo lansa ayera dor di IMF, cu for di momento cu Omicron a bati na porta, a mustra mundo riba e resultadonan devastador di Omicron pa mundo.
Prome cu Omicron ya IMF a lansa su pronosticonan historico den cual el a pone e Coronavirus nobo como e factor principal pa e futuro economico mundial, cu awor ta den problema serio.
IMF a papia di un problema serio cu ta spera y ayera a relata directamente e medidanan na Merca y tambe desaroyonan financiero cu e pasonan cu Gobierno Mericano lo tin.
Aruba sigur mester biba cu e realidad cu Omicron ta afecta Aruba y henter mundo durante e temporada cu generalmente ta produci mas placa pa paisnan y negoshinan.
A wordo mustra con rond mundo Omicron a haci cu medidanan mester a wordo tuma y asina a afecta henter sector di turismo, cu tabata den un ambiente di hopi aliento.
Ora e pensamento eroneo a wordo crea cu a domina Delta na un mundo caminda ainda un gran mayoria no a vacuna y ainda tin cantidad di casonan di e virus, Omicron a haci su entrada cu velocidad grandi.
Den e temporada cu cantidad di hende tabata prepara pa biaha y cu negoshinan a mira como inicio di recuperacion, Omigron a ataca.
Na inicio hopi hende a insisti pa sigui cu nan plannan pa e temporada mas halto di economia y sigur turismo.
Di e forma aki Omigron a sigui plama y a sorprende biaheronan rond mundo.
No ta trata solamente di haya Omicron durante vacacion, pero tambe di medidanan manera lockdown cu a bati alarma den mundo di turismo.
Hopi turista mester a bolbe cas ora paisnan a cuminsa lockdown. Problema a bordo di crucero. Buelonan cu a wordo gescrap.
Tur esaki a conduci na incertidumbre, cu ta e mayor enemigo di e turista cu kier gosa di su vacacion pero tambe di sector di turismo.
A keda demostra atrobe cu turismo ta un industria fragil.
Nos ta sigur en espera di mas informacion di Gobierno riba e atraccion di inversion riba termino mas cortico posibel.
Ta importante pa mientras ta atende cu inversionistanan grandi den exterior, tambe habri mas incentivo pa industria local.
Tin capital na Aruba y tin Arubiano cu por inverti ainda. Pero mester amplia y ahusta e exigencianan cu ta presenta den e situacion nobo.
A keda demostra cu Aruba mester di industria y tambe amplificacion di servicio digital cu sigur den e pandemia a demostra su balor.
Cifranan ta indica cu e sector di turismo a keda e sector mas facil pa inverti, pero cu Covid-19 a demostra e peliger cu esaki ta encera debi na e hecho cu e ta depende di trafico humano.
Covid-19 a paralisa mundo. El a paralisa tur produccion, cu mester di hende presente na un sitio di trabou sigur pafor di cas, loke sigur ta e realidad di hopi negoshi den sector turistico.
Mester haci comunidad consciente di e situacion nobo y e forma cu e ta bay afecta sigur e prome parti di 2022, cu lo tabata e temporada pues di mayor entrada pa e pais.
E problema mas serio cu tin actualmente ta, pa haci hende realisa cu tur hende y tur instancia mester baha gasto mientras ta planea of ehecuta plannan.
IMF mester haci hende consciente cu awor no por papia di Carnaval cu a bay perdi como epoca di baila pero cu na prome lugar mester wordo considera epoca cu no ta bay produci e placa di prome cu 2020 ora Covid-19 a ataca.
