E lo yuda prijs di fruta y berdura baha bek --- ORANJESTAD (AAN): Varios reaccion a tende di ciudadanonan cu a comenta, cu di berdad ta dificil pa haya Banana e dianan aki na Aruba.
Tambe a haya mas reaccion riba e hecho cu prijs di berdura ta subiendo drasticamente, debi na e crisis economico mundial actual.
E dianan aki, clientenan sa topa cu e.o. lechuga di entre 6 y 9 Florin den supermarket. Prijs di strawberry ta casi impagable.
Aki ta unda cu algun persona a mustra, cu nan tin sigur cu si acaso e frontera cu Venezuela tabata habri ainda, cu stock di Banana, Awacati, Lechuga, Pampuna, Patia, etc., lo no caba nunca.
DIARIO a haya sa, cu esey ta e pensamento tambe di un grupo di 10 comerciante Arubiano chikito kendenan pa mas di 25 aña tabata importa productonan for di Venezuela. Ta trata aki di companianan cu smper tabata cumpli cu nan trahadornan y funciona corectamente. Semper e economia di trece fruta for di Venezuela a draai bon.
Nan tabata importa principalmente fruta y berdura for di Venezuela. Pero desde 3 aña pasa cu e frontera a cera, esaki a pone nan pasa den momentonan dificil. Varios trahador obligatoriamente mester a bay.
Awor cu e frontera ta mas di 3 aña cera caba, kizas e momento a yega pa Gobierno brainstorm un tiki, y mira e aspecto for di otro angulo y pensa con kizas si habri frontera a lo menos pa carga Venezolano drenta, cu e lo ta na beneficio di comercio y tambe pa consumidornan. Gobierno tin di cuminza realiza, cu e cierre di 3 aña ya a ‘manda e mensahe’, y e momento a yega pa bin cu cambio.
Tin di corda cu na diferente ocasion a trata na trece productonan for di Venezuela, pasando un ‘brug’ via Colombia pa finalmente yega Aruba. Sinembargo esaki cada biaha ta haya obstaculo y extra cobranza cu na final ta bira dificil pa e importadornan, y productonan ta yega laat pa consumidornan.
Que hubo pa habri frontera bek cu Venezuela, djis pa acepta carga? E diez comerciantenan aki hunto lo bay percura pa djis trece 2 barco pa siman. Nan lo yega waf riba Dialuna mainta, y ya caba pa Diamars atardi nan lo sali bek di regreso. Por hasta pone, y acepta e condicion cu e tripulantenan no mag di sali for di Waf tampoco.
Esey ta unico cu lo exigi, y unavez cu bay di acuerdo, Aruba por tin abundancia bek na fruta y berdura na prijs cu no ta kraak cartera.
Un fuente a indica cu na Venezuela tin produccion, y tin suficiente pa abastece e mercado di Aruba. Cu djis permiso pa acepta carga Venezolano, mesora e diez companianan local aki (di Arubiano) lo bay tuma trahadornan bek den servicio, cu alavez pues ta yuda cu empleo tambe.
