Instituto Kateketiko Diosesano Aruba ta dedida calender na Birgen Maria di Alto Vista

Pastoor Hose Miguel:

ORANJESTAD (AAN): Instituto Kateketiko Diosesano Aruba, pa duna honor na Birgen Maria di Alto Vista, nos Patrona, ta presenta un bunita calender cu e meta pa yuda pa e devocion crece den cultura di nos pais. Den combersacion cu DIARIO, Pastoor Hose Miguel di e instituto, a expresa cu pa haci esaki posibel, ta promove e imagen di nos Patrona riba e cover di e calender. E cover ta ilustra tambe e Kapel di Alto Vista, cu ta e prome luga unda e fe cristian a drenta nos isla.

    Tambe tin e bandera di Aruba, mustrando cu e fe cristian a permiti tambe pa nos isla por construi nos structura. Hopi di nos structuranan a nace y crece bou di Iglesia Catolico, entre otro, hospital y scolnan.

   Tambe, Pastoor Hose Miguel a menciona, cu pa promove devocion na Birgen di AltoVista, nos Patrona, a incorpora den e calender un oracion hopi bunita dedica na Birgen di Rosario di Alto Vista. E oracion ta obra di Monseigneur Antonios, Vicario Apostolico di Diosesis di Willemstad.

   Cada luna di e calender ta dedica na Mama Maria na unda a dedica na dj’E expresionnan di diferente Santo. Tambe a marca e fiestanan importante y a pone enfasis specialmente riba e fiesta di nos Patrona di Alto Vista na luna di October. Tambe a inclui evangelionan di cada dia pa asina cu esnan cu no por bay misa pa participa, por drenta den oracion na su cas mes.

  Bunita tambe di e calender ta cu na final di aña, por keda cu e imagen di Mama Maria y por pone esaki den un cuadra como recuerdo y pa asina poco poco cada famia por tin un imagen di Mama Maria den nan cas pa resa na dj’E y sinti e forsa di e compania di Dios. Un imagen cu por inspira nos confiansa.