Mildred Wever di IBiSA:
ORANJESTAD (AAN): Weganan Escolar (WE Aruba) a cuminsa ayera, y pa dos siman muchanan di scol lo competi cu otro den un ambiente sano, yena cu energia, disciplina y amor pa deporte, marcando e ultimo trimester di aña escolar 2025-2026.
Schoolsport Coordinator di IBiSA, Mildred Wever a indica cu pa e aña aki tin un interes grandi un biaha mas. Un total di 744 mucha di 42 scol, ta participa activamente den WE Aruba, demostrando cu deporte ta biba y fuerte den nos comunidad escolar.
Pa 12 scol di Kleuteronderwijs tin cuatro ramo di deporte: futbol mucha muhe, futbol mucha homber, kickball mixto y kids athletic mixto. Pa 19 scol di basisonderwijs, e competencianan ta inclui volleyball mucha muhe, futbol mucha homber, kickball mini mixto y WE Mente. Mientras tanto, 11 scol di voortgezet onderwijs lo competi den volleyball mucha muhe, volleyball mucha homber, futbol mucha muhe y futbol mucha homber.
Durante e dos simannan di competencia, lo utiliza tres localidad principal. Na Centro Deportivo Libertador Betico Croes lo hunga tur weganan di volleyball, kickball y WE Mente. Stadion Guillermo Prospero Trinidad lo ta e cancha pa e competencianan di futbol kleuter (mucha muhe y homber) y kids athletic. Y na Cruyff Court Denzel Dumfries lo tuma luga tur otro competencia di futbol.
IBiSA ta desea tur scol y cada deportista hoben hopi exito. Pero mas cu gana of perde, e victoria berdadero ta den participacion, amistad y e caracter cu ta forma durante e weganan deportivo escolar.
