Ministro Gerlien Croes:
ORANJESTAD (AAN): Den un ceremonia oficial di gran importancia pa posicion strategico di Aruba, vice-premier señora mr. Gerlien Croes a inaugura e oficina principal di Directie Koninkrijksrelaties en Europese Unie (DKE). Un iniciativa cu ta marca un paso decisivo den fortalecemento di cooperacion internacional y desaroyo di varios oportunidad pa pueblo di Aruba.
Den su discurso, Minister Gerlien Croes a enfatisa cu e edificio di e directie ta representa un prioridad renoba pa gobierno di Aruba, reconociendo e importancia di mantene y amplia relacionnan tanto den Reino Hulandes como cu Union Europeo. Segun Minister Gerlien Croes, e directie lo sirbi como un centro pa informacion, coordinacion y formulacion di maneho, cu meta di crea mas oportunidad pa crecemento economico, innovacion y prosperidad sostenibel.
E acto a conta cu presencia di diferente dignatarionan internacional, incluyendo e Secretario di Estado pa Relacionnan den Reino Hulandes, Eric van der Burg, y e Comisario di Union Europeo, Jozef Sikela, hunto cu lidernan y representantenan di diferente pais y territorio di ultramar.
Prome Minister di Aruba, sr. mr. Mike Eman, tambe a hiba palabra durante e ceremonia y a subraya e importancia strategico di e iniciativa aki pa futuro di nos isla. Den su discurso, e a indica cu Aruba mester posiciona su mes activamente den e mundo globalisa di awe, probechando di e oportunidadnan cu ta bini for di cooperacion den Reino y acceso na mecanismonan di Union Europeo.
Vice Premier y Prome Minister a enfoca riba e echo cu e apertura di e directie no ta solamente un acto simbolico, sino un compromiso concreto pa inverti den conocemento, diplomacia y capacidad institucional. Segun Minister Mike Eman, e iniciativa lo yuda Aruba pa identifica y utiliza oportunidadnan relaciona cu financiamiento, desaroyo regional y colaboracion internacional, cu lo contribui directamente na bienestar di comunidad.
Tambe a wordo destaca cu Aruba tin experiencia previo cu un structura similar, pero cu circunstancianan a cambia e direccion di prioridadnan. Awor, segun tanto Minister Gerlien Croes como Minister Mike Eman, e momento a yega pa recobra y fortalece e enfoke riba relacionnan den Reino y Union Europeo como pilar fundamental di politica di desaroyo.
“Apertura di e directie aki ta confirma nos compromiso pa traha hunto cu nos socionan internacional y pa crea un futuro cu mas oportunidad pa tur Arubiano,” segun mensahe central comparti durante e ceremonia di inauguracion.
Cu e paso aki, gobierno di Aruba ta reafirma su vision di un pais mas conecta, resiliente y prepara pa enfrenta reto global, mientras cu ta habri caminda nobo pa progreso economico y social den beneficio di su pueblo.
