Gobierno y su minister encarga mester duna Departamento di Rijbewijs prioridad

Thomas Ruiz, vicepresidente di VRA:

• Mester bin cu maneho nobo 

ORANJESTAD (AAN): Siman pasa esnan na Departamento di Rijbewijs a walk-out pasobra ya nan no por sigui traha den condicion di e edificio ey.  E dia ey tur examen di Rijbewijs a wordo posponi.

   Señor Thomas Ruiz, Vicepresidente di Vereniging Rijscholen Aruba (VRA),  a declara den entrevista cu DIARIO, cu atrobe nan ta haya razon den locual pa basta tempo caba (for di 2019), nan ta treciendo dilanti, y e welga cu a tuma lugar na Departamento di Rijbewijs na Santa Cruz, ta duna indicacion cu mester bin un maneho, y e welga cu a tuma lugar a perhudica esnan cu mester pasa examen.

  Segun Ruiz, e minister y team concerni mester bin cu un maneho nobo, y duna e departamento aki su prioridad.

   “Manera nos por mira den media, dia aden di afo, tin critica tocante e trafico, hopi hende e dianan aki ta papia over di e bicicletanan y turistanan cu ta free for all riba caminda. No mester warda riba un desgracia, desgracia a pasa caba, kiermen e baca a hoga caba. Pero mester tuma accion”, Thomas Ruiz ta remarca.

Ruiz a expresa cu VRA ta para banda di esnan cu a welga, pa duna nan sosten, pasobra e situacion aki mester di atencion.

   El a agrega cu VRA a bin cu un solucion caba cual tabata poni na mesa, for di basta aña caba y hasta tabata tin hopi propaganda cu lo independiza e Departamento di Rijbewijs. Pero nada te awe, y na un aña di e gobernacion nobo, nada a wordo haci tampoco.

   A lanta un comision, pero no a tende kico nan ta bezig cu ne. Tambe e Comision Central di Husticia den Parlamento ta bezig cu ne. “Nan ta papia hopi, pero hecho ta cu nan ta papia pa nan mes” Thomas Ruiz a señala. “Wak unda nos ta para aworaki den pleno 2026? Mesun caminda. Wal e slag porcentahe, e no a subi mas di 30%. Ainda e ta entre 23 cu 29% mas of menos. E coleganan aki ta haci nan best, pero  nan no por dobla hero cu man!”, Ruiz a remarca.