Parlamentario Marco Berlis: --- *Tur dos, secuestro y esclavitud ta castigable pa ley
ORANJESTAD (AAN) – Parlamentario Marco Berlis, den conferencia di prensa di fraccion di MEP, a sigui elabora riba e tema di e personanan di afo, cu ta haci trabao domestico na Aruba, y ta keda biba cerca su doño di trabao, unda nan wordo priva di nan derechonan, cu ta hancra den ley.
E parlamentario, durante e ultimo simannan cu a pasa, a haci mas investigacion di e leynan cu tin, y a consulta algun di su coleganan riba esaki, y e tabata tin un reunion cu CMMA (Centro di Coordinacion di Mensenhandel y Mensensmokkel Aruba) cu ta un stichting cu ta realizando un excelente trabao den e area aki y otronan tambe, segun Berlis ta remarca.
E parlamentario a bisa cu un di su preocupacionnan ta e abusonan cu ta sosodiendo den varios cas y esey ta un problema basta serio na Aruba.
El a agrega cu ta dificil pa autoridadnan actua, pasobra hopi biaha e trahadornan domestico aki ta wordo amenaza y intimida, y nan no por sali pa nan derechonan.
Berlis a splica tambe e diferencia entre “mensenhandel” y “mensensmokkel” pa asina e por trece concientizacion den pueblo di Aruba, tocante kico esaki ta y con castigable esaki ta pa ley. El a referi na diferente articulo stipula den e buki di trabao, tocante esaki.
“Mensenhandel” ta ora un trahador domestico ta wordo maltrata, amenaza, intimida na unda e doño di trabao ta kita su passport, y cosnan similar cu ta castigable pa ley.
El a bisa cu ora un persona tin un trahador domestico den su cas, y e ta kita su passport y priv'e di tur tipo di libertad, y e no por sali haci locual cu e tin derecho riba dje, pasobra pa ley e tin derecho riba su tempo liber, su breaknan y su vacacion. Ora un doño di trabao ta haci esaki e ta wordo considera un secuestro.
Secuestro ta algo cu ta wordo castiga pa ley, na un manera hopi severo, Berlis a splica. Esaki ta informacion cu el a adkiri atravez di CMMA, y diferente otro instancia cu a splike cu tin un castigo hasta di cuater aña pa secuestro. E parlamentario a comenta cu e mes conoce cierto casonan y tambe tin hende cu a informe cu nan ta traha cerca un doño di cas y nan ta kita nan passport. El a reitera cu esaki ta castigable pa ley y ley ta tume hopi na serio. El a referi na e parti di “mensensmokkel” cu ta ainda mas castigable. Esaki ta ora un persona ta wordo busca pa traha na cas, pero e ta wordo forza pa haci un otro tipo di trabao; ta wordo amenaza pa e coopera, y si e no coopera e ta wordo deporta. Si e persona, continuamente ta bao di amenaza, e ta den un situacion hopi dificil y vulnerable, y nan ta probecha di e vulnerabilidad aki.
Otro ehemplo ta ora e doño di trabao ta obliga e persona traha pero no ta pagu'e locual e mester paga of no ta pagu'e mes. “Esaki nos ta yama esclavitud y tambe e ta hopi castigable pa locual ta ley”, Parlamentario Marco Berlis a subraya.
