Ronald Plasterk a activa Statuut y Raymond Knops a splica Statuut --- * Pueblo Hulandes critico di nan Gobierno nobo y e berdad di autonomia --- *E condicion pa Statuut na 1954 tabata un economia fuerte pa “De West”
ORANJESTAD (AAN) — Dialuna tabata un dia sumamente importante pa Reino Hulandes, cu segun mundo ta basa riba uno di e miho formulanan estatal existente.
Statuut ta regla relacion entre uno di e paisnan mas rico na mundo, cu ta Hulanda y seis isla chikito den Caribe.
Na momento cu Reino Wilhelmina durante guera for di Londres a bisa cu e colonianan Hulandes den Caribe y Surinam lo haya autonomia, el a bisa imediatamente cu e relacion aki lo tabata basa riba e realidad, cu tur pais mester sigura su propio base pa para riba su pia pero cu tur pais lo ta dispuesto pa yuda otro.
Entrada di Siglo 20 tabata marca pa e accionnan na colonianan pa bira autonomo. Colonianan Hulandes na Oost y West a exigi pa nan tin nan autonomia financiero prome cu haya autonomia estatal.
Un economia cu lo a habri porta pa autonomia di Aruba, ta loke Hulanda a yuda crea cu entrada di Shell na Curacao pa medio di e interesnan petrolero di Shell na Venezuela y e apertura di Canal di Panama.
Despues Aruba a atrae Lago y pa e colonia Hulandes den Caribe (ta un colonia tur e islanan tabata forma) den Segundo Guera Mundial, economia na Aruba y Curacao a permiti un epoca autonomo.
Den e cuadro aki mester mira e promesa di Reina Wilhelmina y e Statuut cu a bira realidad dia 15 di December 1954 pa Antia Hulandes di cual Aruba tabata forma parti como teritorio insular.
Statuut a haci Hulanda, Surinam y Antia Hulandes partner igual, cu mester a para riba nan propio pia.
Hulanda a brinda yudansa. “Meerjarenplan” a produci hopi proyecto importante. Pero e gobernacion di e paisnan semper a keda mara na e condicion di “autonomia financiero” cu a bira exigencia pa Aruba como pais na 1986.
Hulanda nunca a bandona su exigencia. Ehempel ta e hecho cu ora Aruba a bay crea un economia basa riba garantia na 1986, Hulanda a exigi pa deshaci di tur peliger cu esaki tabata encera.
Pues na 1986, Hulanda a deshaci di e autonomia pa un Gobierno Arubano haci loke e kier y a exigi un maneho responsabel.
Na Siglo 21, awa a pasa hariña. Debenan nacional tabata sigui crece pero a bira explosivo despues di 2009, ora a baha BBO cu mitar y a introduci un maneho di spart placa.
Tabata Ministro Ronald Plasterk cu a activa Statuut y a splica e Prome Ministro di e tempo, Mike Eman, cu Hulanda no por a keda seguro financiero pa Aruba.
Na 2014 e otro parti di Statuut a wordo activa dor di Plasterk, pero e proyecto di Citgo a crea un oportunidad pa Gobierno di Mike Eman sconde.
Na 2017, e fantasia di Citgo a rementa hunto cu e caha di placa di Aruba.
Raymond Knops mester a splica Statuut ora el a bira e Ministro cu mester a ehecuta un supervision skerpi conforme exigencia di Statuut.
Na 2020 Raymond Knops den e problema serio di Covid-19, a exigi un supervision Hulandes cu ta mishi hasta cu e poder di Parlamento di Aruba.
Discusionnan den Reino ta sigui riba e punto aki, cu basa riba e lucha pa autonomia, DIARIO tampoco por sostene.
Pero basa riba e realidad cu Parlamento tambe a faya y a permiti 1.6 Biyon pa proyecto sin control y basa riba e forma cu Parlamento a permiti e creacion di debe nacional dor di Gobierno Mike Eman, Raymond Knops por tene na Statuut ora e exigi cu Hulanda por interveni si Parlamento atrobe bay contra interes di Aruba, manera a socede entre 2009 y 2017.
Ayera un Gobierno Hulandes nobo a sinta y asina Gobierno di Reino a haya un constelacion nobo.
Alexandra van Huffelen a haci su entrada y ta reemplasa Raymond Knops den un Gobierno Hulandes, cu un parti importante di Pueblo Hulandes, no ta sostene.
Ta trata di un Gobierno fragil cu ta continuacion di e gobierno anterior, pero a tuma nueba luna pa yega na un acuerdo.
E Gobierno aki tin tres aña pa goberna prome cu eleccion nobo bati na porta. Pues e mester traha sin mucho tempo pa coregi loke no ta agradabel den vista di votadornan.
Alexandra van Huffelen mester por splica su maneho na su votadornan, na un Pueblo Hulandes cu ta paga hopi mas belasting cu Aruba y cu tambe ta a wordo seriamente herida dor di e pandemia.
Alexandra van Huffelen a hereda e ehecucion final di e esencia di Statuut cu ta cu tur pais mester tin nan propio forsa financiero.
Den e cuadro aki, e maneho di Gobierno Wever-Croes lo bira sumamente importante pasobra den un crisis mundial, Statuut lo prevalece.
