CARACAS: E artistanan mes a divulga esaki via di social media!
Un di nan ta e cantante Miguel Angel Cancel Vazquez, kende a skirbi: “Nos vemos pronto Venezuela”, y el a uza e hashtag di #PoliedroDeCaracas riba e mensahe ey.
Na e confirmacion oficial aki a uni tambe Johnny Lozada, kende a expresa: “Aki nos ta bin Venezuela”, cual mensahe el a usa un hashtag di #SubeteAMiMotoTour.
Te ainda no tin hopi detaye di e show cu e ex-integrantenan di Menudo lo bay duna, sinembargo a haya sa cu nan lo presenta dia 20 di Augustus 2022 na Poliedro na Caracas.
Tabata na aña 2019 cu e re-union di e grupo musical di hispano a start, y nan a haci esey riba e stage di Coliseo de Puerto Rico. Pa 2020 nan a duna show na varios ciudad na Merca, sinembargo e tour a stop debi na morto di Ray Reyes.
Ademas di Ray Reyes, awor tin indicacion cu e cantante René Farrait lo no bay tey na e tour, debi cu e lo tin supuesto diferencia di opinion cu e otro integrantenan, y tambe debi cu e ta trahando riba su carera como solista.
Nan a duna e prijs tambe di ticket pa bay mira e show na Venezuela. Si bo kier para mas dilanti na e stage, e prijs ta 440 Dollar. Tiki mas leu ta 330 Dollar pa Diamante. Prijs di Platinum ta 275 Dollar. Ticket pa Gold ta 220 Dollar.
Mas pafo tin prijs di 100 Dollar, ticket tambe di 80 Dollar, y mas patras e ta costa 55 Dollar.
Te cu awor, esnan cu a confirma cu nan lo tey na Venezuela ta Miguen Angel Cancel Vazquez, Johnny Lozada, y Ricardo ‘Ricky’ Omar Melendez Sauri.
