Fundacion Pro Cultura Arubano lo presenta un Reina Chikito y un Dama Grandi durante e parada di 4 September venidero

Comisionnan Pro Cultura, Bernadina y Chico Harms trahando hunto

ORANJESTAD (AAN) – Presidente di Fundacion Pro Cultura Arubano, a yama un conferencia di prensa Diahuebs, den cual señora Lilian Beselink, presidente di e fundacion, a hiba palabra.

            E dama a duna informacion tocante locual e fundacion ta bay haci pa e Parada di Fundacion Chico Harms, dia 4 di September venidero. Esaki ta e prome bez cu Fundacion Pro Cultura Arubano ta bay manda un reina chikito y un dama grandi pa participa, y nan ta bay manda nan grupo tambe. 

            E aña aki e fundacion ta bay homenahea Trio Las Campiranas, y tin un grupo di mucha cu ta bay balia den e show, y despues ta bin e grupo di hende grandi unda nan ta bay celebra e fiesta cultural. E Baby cultural e aña aki ta bay ta Lisenly Flanegien cu tin seis aña di edad, y Dama Grandi Folklore ta Antonia Hilaria, y e tin 49 aña di edad. E lo participa dia 27 di Augustus den Centro di Bario Brazil, unda e fundacion lo saca nan reinanan cultural.

            Señora Beselink a menciona cu Fundacion Pro Cultura Arubano tin hopi aña ta traha cu Fundacion Bernadina y nan ta sostene otro, pero e aña aki nan a sostene Pro Cultura.

Seguidamente, señor Percy Jeand’or, di Comision Bernadina, a hiba palabra y a bisa cu nan hunto cu Comision Pro Cultura, ta trahando duro pa sigui mantene e festival y bunita parada aki, cu ya Diadomingo cu a pasa tabata tin un bunita parada di cultura.

            Jeand’or a expresa cu locual ta importante ta pa trece union den e hendenan, pa Arubianonan no odia ni bringa otro, sino cu e meta ta pa atrae mas hende, pa bay den cultura. Y si tin ideanan di antes cu por bin cune semper ta bon bini. El a bisa cu e ta masha contento cu tur hende kier asisti e fundacionnan bunita aki: Chico Harms, Pro Cultura y Bernadina. Cultura di Aruba merece di apoyo y segun Percy, falta hopi ainda pasobra hopi hende local ta prefera wak cultura di otro pais pero di Aruba nan ta zink.