Gobierno ta analisa plan legal pa mehora funcionamento di Aruparking

Minister di Husticia Arthur Dowers:

ORANJESTAD (AAN) Durante un entrevista cu DIARIO, Minister di Husticia Arthur Dowers a duna mas detaye tocante e plan di Gobierno pa mehora e funcionamiento di Aruparking. Den conexion cu e di 10 aña desde cu Aruparking a wordo institui, a lansa un proceso di conscientisacion pa informa pueblo tocante e regulacionnan vigente pa parkeo den zonanan identifica caminda ta obliga pa paga, manera ta stipula den ley.

   E controlnan anteriormente a wordo suspendi, y e practica di “klemmento di auto” a wordo elimina. Actualmente, Gobierno ta analisa cua cambio legal mester tuma luga pa reintroduci e controlnan, y pa implementa sancion pa esnan cu no ta cumpli cu e ley di parkeo. Minister Dowers, ta elogia y ta gradici tambe tur e ciudadanonan cu apesar di e situacion actual y e hecho cu no tur ora ta haya luga di parkeer, a keda cumpli cu e ley cu ta vigente.

   Un cambio principal cu a wordo propone, ta pa permiti parkeo den tur espacio cu ta claramente identifica, y no necesariamente solamente den un vak den un zona specifico. Esaki ta duna mas flexibilidad y fadilidad pa usuarionan.

   Minister Dowers a indica cu e siguiente fase di e plan ta pa reintroduci e controlnan di parkeo. E minister a enfatisa cu e no kier uza cuerpo policial pa esaki, pasobra e ta kita capasidad operativo di Polis. No obstante, e controlnan lo reinicia, pa evita un situacion di ‘free for all’ manera a tuma luga durante hopi tempo.

Den e maneho nobo, despues di e prome advertencia, un persona lo por haya un segundo advertencia, y despues lo sigui un sancion. E sancion aki por representa un gasto significativo cu, segun e minister, facilmente por a wordo evita. Por ehempel, e costo pa parkeer un dia completo of pa un abonement ta considerablemente mas abou cu un multa, cu por yega hasta 500 Florin.

Minister Dowers a enfatisa cu si un ciudadano scoge pa parkeer ilegalmente of stroba e trafico, lo tin consecuencia husto. Segun su palabra, para unda cu ta no ta un comportamento nechi, y sigur tampoco ta husto pa esnan cu ta sigui e regla y ta paga pa su parkeo manera mester ta.Bottom of Form