Relacionista Publico di DIMP Meverly Romano ta splica:
- Mirando volumen grandi DIMP no por permiti pa mil persona yega na porta
ORANJESTAD (AAN) – Señora Meverly Romano, Relacionista Publico di DIMP, a duna di conoce den entrevista cu Matutino DIARIO, cu partimento di plachi number ta bayendo hopi lihe, pero mirando e volumen grandi cu tin aworaki, DIMP no por permiti pa mil persona yega na nan porta.
Romano a splica cu den pasado nan a pasa den tur esaki; tin personanan cu ta bisa pakico e sistema di cita, miho bo ta paga bo number, bo ta bay. “E persona ta wak pa su mes, e ta paga su number e ta bay. Nos ta wak e totalidad, nos ta wak cu nos tin tanto mil cliente, nos tin cu yuda tur e tanto mil clientenan aki. Imagina si nos bisa paga bo number y bay, bo ta haya bo trankil cu 2 mil, 3 mil hende na bo porta, anto tur hende para den solo”, Meverly Romano a señala.
El a splica den pasado nan a topa cu rijnan largo di hendenan para den solo, nan mester a pone mas tent, extra seguridad, tin hende cu casi a bringa cu otro pasobra otro a pasa su dilanti, tabata tin hendenan grandi para den rij cu a bira malo; tin personanan cu ta sufri di diabetes, por ehempel, y nan ta bira malo para den e solo, loke no ta humano. “Pesey nos a prefera haci cambio e biaha akinan y mi tin cu bisa cu nos a haya bon comentario pa e servicio, con lihe e ta bay, di otro banda. E berdad ta cu e persona tin cu warda un poco mas pa e fecha di su cita yega, pero miho asina cu nos tin un grupo grandi cu ta wardando cu tin un caos eybao”, señora Romano a señala.
