ORANJESTAD (AAN) – Minister di Finanzas Xiomara Maduro, a duna un bista den conferencia di prensa di locual e presupuesto 2022 ta encera, y a trece dilanti cifranan cardinal pa loke ta trata entrada y gastonan di Gobierno.
E mandatario a sigui splica cu pa locual ta inversion, esaki ta premira di subi cu 16 miyon florin, relaciona cu trabaonan urgente cu tin cu pasa na locual ta e planta di awa (RWZI). E proyecto mes ta uno grandi, pa cual gobierno no tin e fondo cu ta 60 miyon florin, pero aworaki tin un solucion provisional cu ta costa 16 miyon florin. E mandatario a bisa cu e suma pa fianza di estudio ta keda mescos.
Entrada ta premira pa subi cu 162 miyon florin, manera a indica caba, debi na e mehoracion economico y cu a stop e sosten financiero cu ta haci cu e gastonan ta baha cu 120 miyon florin.
Esaki ta hiba Aruba tambe na un necesidad financiero di 112 miyon florin mas y tambe un deficit financiero cu ta menos, compara cu aña 2021 esaki ta 295 miyon florin menos e aña aki.
NECESIDAD FINANCIERO: Minister Xiomara Maduro a indica cu awo ta bon pa tira un bista riba locual ta bira e necesidad financiero pa 2022.
El a splica pa cubri tur gasto di e aña aki, e suma ta core den 1.651 miyon florin. Esaki ta por haci e servicio di debe, cu ta un suma di 1.360 miyon florin, cu ta consisti di Aruba su debe internacional cu pa e aña aki tin cu paga 346 miyon florin. E debe cu gobierno tin cu Hulanda, pa e sumanan cu a traha relaciona cu Covid-19, ta di 904 miyon florin florin, cu ta e fianzanan cu gobierno a haya y cu ta madura e aña aki na April.
Tambe tin un debe local cu ta di 110 miyon florin. Banda di esaki gobierno tin un debe di 291 miyon florin, cu ta un suma cu mester bay busca, sea via Hulanda of riba e mercado local.
E mandatario a expresa cu e pregunta cu ta bin na mente ta: Con ta bay cubri e necesidad financiero aki, pa 2022?
“E ta asina aki cu e debe internacional cu Aruba tin di 346 miyon florin, na September aña pasa Hulanda a presta Aruba 523.1 miyon florin, pa asina por a paga e debe internacional di 2021, cu ta 177.1 miyon, y pa e aña aki cu ta 346 miyon. Pues, pa loke ta e debe internacional pa e aña aki, ya caba Aruba ta cubri e parti aki”, Minister Xiomara Maduro a señala.
Pa locual ta e fianzanan pa e likidez financiero y pa por a brinda subsidio di salario, entre otro, e suma ta core den 904 miyon florin, y esaki ta caminda Aruba a cuminza delibera aña pasa caba cu Hulanda, pasobra e debe aki ta madura na April 2022, y aworaki ta ainda den negociacion pa asina por refinancia e debe aki, e dignatario a splica.
El a agrega cu pa loke ta trata e debe local di 110 miyon florin, den palabracion cu Hulanda, Aruba mester financia esaki riba mercado local, y tambe e deficit di 291 miyon, Aruba mester haci esaki sea via sosten di likidez di Hulanda, of riba mercado local.
“Pues, cu otro palabra, Aruba mester busca e aña aki 1.305 miyon florin pa asina ey tin fondo pa cubri e debe cu Hulanda, si acaso esaki no wordo refinancia, e debe local di 110 florin y tambe e deficit di 291 miyon florin, pa asina por implementa presupuesto 2022”, Minister di Finanzas a remarca.
