SANTO DOMINGO: Un Venezolano y tres Dominicano a wordo intercepta riba lama ta tratando di drenta e pais cu un cargamento grandi di cocaina, abordo di un speedboat tipo Go-Fast, cu aparentemente a sali for di La Guajira (Colombia).
Nan a wordo detecta den e area zuidoost di provincia di San Pedro de Macoris. E persecusion riba lama, usando boto y tambe avion, a dura como 12 ora. Pero na final a logra stop e Go-Fast aki di 23 pia largo.
Abordo tabatin 27 saco grandi, y den nan a haya un total di 675 paki conteniendo cocaina.
E Go-Fast a usa 15 baki di combustible, y tambe dos Outboard Engine pa haci e viahe. Tambe nan tin Marine GPS pa por sa ki ruta pa tuma, y un pistol marca Browning di 9 mm cu un peña, un frigidaire chikito cu awa y cuminda.
Manera ta pasa ultimo tempo, autoridad Dominicano no ta divulga na prensa kico e peso di e droga aki ta. Pero si a bisa cu di Januari 2021 te cu November 2021, nan a confisca casi 22 ton di cocaina, marihuana, crack, ecstasy, y demas droga.
