Na 1824 Santa Cruz ya caba tabata tin su propio misa chikito. Misa di Santa Maria. Segun cu añanan ta pasa Santa Cruz ta keda crece y e necesidad pa habri un school basico ta bira mas grandi.
Pastoor Paulus y su Kapelan de Vries tambe ta mira e necesidad. Traha un lugar pa duna les no ta problema pero haya un educador ta e dolor di cabes mas grandi. Pastoor Paulus ta pidi Obispo Niewindt permiso pa trece e ruman homber di Kapelan de Vries Aruba. Antonius de Vries tabata domina matematica, Hulandes y Frances. Obispo Nieuwindt ta duna su aprobacion y por a paga Antonuis de Vries Fl 100 pa aña y Antonius de Vries ta bin Aruba na 1853 y ta cuminsa cu duna les den un cas no mucho lew di e cas di Pastoor pega cu misa Santa Maria. No tabata tin nomber oficial pa e school pero tur hende tabata yama e school
Santa Maria mescos cu e misa. Na 1857 Aruba su poblacion a keda azota pa Keintura Preto y Keintura Geel y a costa bida di 70 habitante incluyendo Antonius de Vries. Esaki tabata un sla pa e dunamento di les na Santa Cruz. Pastoor Paulus hunto cu Kapelan de Vries tabata duna catasashi y tabata yuda cu dunamento di les. Na 1863 Souernan Hulandes di Franciscanessen ta cuminsa yuda cu dunamento di les na Santa Cruz cu a dura te cu 1910.
Na 1863 Santa Cruz ta bira un parokia y e misa ta cambia di nomber y ta bira Maria Inmaculada Concepcion. E school ta keda cu usa e nomber Santa Maria.
Na 1863 te cu 1910 educacion na school Santa Maria tabata bao encargo di Souernan Franciscanessen di Hulanda.
Na 1912 Souernan Dominicanessen ta tuma encargo di e school y ta sigui como un school catolico manera inicialmente.
Na 1931 Laura Wernet Paskel ta cuminsa traha como maestra na e school ta cu 1937.
Atraves di aña diferente maestro a traha na Maria School incluyendo Zuster Cecilia cu tabata cabesante di e school.
Durante añanan 80 pa 90 e school tabata guia pa Juffrouw Betty Croes ayuda pa Juffrouw Lucia Croeze cu maestronan manera Juffrouw Alba Robert cu tambe tabata directora di Maria School pa un temporada, juffrouw Susi Croes cu ta maestra pa hopi aña na Maria School, Meneer Andres Krozendijk, Meneer Onty Lopez, Meneer Andres Rasmijn un temporada y asina por sigui menciona.
Por bisa cu Maria School tin alrededor di 160 aña di existencia y por ser considera parti di e cuna di enseñansa na Aruba.
Compila pa Roberto Croes
Nos Historia Nos Herencia
