ORANJESTAD (AAN) — For di aña 2010, e Dia Mundial di e Medico di Cas ta wordo celebra. Den paisnan hispano ta e Dia Mundial del Medico de Familia, y na paisnan di habla Ingles: 'Family Doctor Day'.
E tema di enfoke pa aña 2021 ta: 'Construyendo e futuro cu docternan di cas' (Building the future with Family Doctors).
E Organizacion Mundial di Docternan di Famia (WONCA) ta promove e celebracion di e dia aki, como reconocemento na e importancia cu e docternan di cas tin, den e atencion di e salud di henter e poblacion.
E Dia Mundial di Docter di Cas tin como meta rindi homenahe y reconocemento na e profesionalnan aki y resalta nan papel esencial dentro di e sistemanan di salud, na henter mundo.
Docternan di cas no solamente ta traha den e area curativo, pero preventivo tambe. E hecho cu nan ta atende den cuido primario ta sumamente importante, pasobra esaki ta e base pa pashentnan por haya tratamento mas avanza na momento cu nan mester, cu un docter di cas wak cierto sintomanan cu ta rekeri di testnan mas specifico cu un test di laboratorio gewoon, y asina pashentnan por wordo yuda y hasta scapa nan bida, ora nan ta bay den man di specialista.
DIARIO tin palabranan di pabien pa e docternan di cas y e personal cu ta traha cu nan, cu ta nan man drechi den e mundo compleho di cuido medico di tur dia.
